拋荒的故事（第五輯）田庄人氣紀事（2CD＋ 1書）

推薦序一

阿仁五仁式ê散文小說--為《拋荒ê故事》第五輯講幾句仔話／李勤岸

一向佮意陳明仁ê小說。Tī伊ê小說內底，我學著足濟物件。伊ê台語詞真豐富，變化真濟，做一个台語文作家ê條件真成熟。

我上佮意伊小說內底彼款ê「幽默」，彼款有點仔激五仁，又閣袂傷過分，「火候」拄拄好ê滋味。

講是心適，講是趣味，又閣有點仔心酸，有點仔同情，有點仔哲學。伊講看人看伊ê「喜劇」干焦一直笑，伊suah哭出來，就是伊真正激ê毋是五仁，其實是伊阿仁式ê烏色幽默無予人了解。了解ê人應當是一面笑，一面流目屎。

我佮意伊ê小說猶有我個人ê因素。雖然平平是庄腳大漢ê台語文作家，伊成做真有鄉土味，真有農村氣質ê作家，我suah無。我suah顛倒真西化，真都市化。毋過，我ê內心猶是有真濟庄腳ê記憶，這tī阿仁ê小說內底攏有描寫著，每遍讀著，攏真感動，因為若親像是我家己故鄉ê故事。Tī《拋荒ê故事》第五輯內底寫著ê人物，tshiāng拄tshiāng，阮庄裡嘛攏有。譬如講，〈痟德仔掠牛〉內底ê痟德仔，tī阮庄裡就是痟木源仔；〈鱸鰻松仔〉tī阮庄裡就是木己仔…。這可能就是一个作家成功ê原因，伊寫出普遍性，人性ê普遍性。伊ê小角色，抑是講「歹人」，結果攏予你感動，予你笑了隨流目屎。

當然，我知影任何小說，包括阿仁ê「散文小說」嘛是有虛構ê成分，若無，就袂遐爾有故事性，遐爾吸引人。毋過，阿仁攏會真正經，抑是激五仁，交代讀者，伊「干焦是照我所知ê，寫出來niâ」！

這部冊，真值得紹介予想欲讀台語作品，卻毋知影欲uì佗一本開始讀ê人。

推薦序二

走揣拋荒的田庄價值觀──做伙來讀陳明仁《拋荒的故事‧第五輯田庄人氣紀事》／丁鳳珍（彰化埔鹽人）2013.7.31

「伊蹛佇墓仔埔邊一間低厝仔，毋是塗kat壁--的，是竹管仔抹牛屎塗的壁，厝頂崁稻草，壁頂有發草佮藤仔。厝跤閣發幾模菅蓁仔，吐芒白白，定定有竹虎仔、杜定爬--過。」讀到這段文字，早就毋知走去佗位藏的囡仔時，雄雄閣跳出來佇目睭前。這是咱彰化的作家陳明仁先生佇〈乞食庄的人氣者〉內底，咧紹介乞食un仔in厝。嘛是彰化人的阮，細漢時阮兜嘛是竹管仔抹牛屎塗的厝。咱彰化是農業大縣，過去散赤的年代，人佮人做伙靠燒的日子，這馬濟濟的囡仔無法度理解，因為in完全無經驗，致使老人閣較心悶孤單，好佳哉咱有陳明仁的台語文學，予咱會使透過作者滑溜活跳的台語，轉去咱懷念的古早田庄，佇陳明仁的台語文學世界，咱這寡愈來愈有歲的彰化人，會當閣再拄著古意樸實的少年時，心情歡喜甲袂閣再心悶。所以，今咱欲來佮逐家分享咱彰化作家陳明仁先生佮伊的台語作品《拋荒的故事》。

陳明仁，筆名有：Asia Jilimpo、阿仁、Babuza A. Sidaia，1954年出世，彰化縣二林鎮原斗里竹圍仔庄人，厝裡種田做穡。原斗國校、省立台中二中初中部畢業，高中佇台中讀一學期，了後去台北食頭路，暗時讀高中夜間部，大學讀文化大學中文系，研究所讀哲學，捌去美國讀戲劇，主攻編劇語言。1985年開始用台語寫詩，1996年創辦台語文學專業雜誌《台文罔報》。這馬是海翁台語文教基金會理事長、李江却台語文教基金會常務董事、《台文通訊BONG報》社長、林榮三公益文教基金會台語文學講師、《台語教育報》總編輯。台語文學作品有詩集《走找流浪的台灣》(1992)、《流浪記事》(1995)，《陳明仁台語歌詩》(1996)；小說、舞台劇本、散文《A-chhûn》(1998)、《Pha荒ê故事》(2000)、《路樹下ê tō͘-peh-á》(2007)，合集有《陳明仁台語文學選》(2002)。

《拋荒的故事》的文字單行本佇2000年由台北市的台語傳播公司出版，銷路真好，賣甲空空空。前衛出版社自2012開始，製作出版陳明仁的台語文學有聲冊《拋荒的故事》精裝套冊，總共6輯：第一輯田庄傳奇紀事（2012.10）、第二輯田庄愛情婚姻紀事（2013.5）、第三輯田庄浪漫紀事（2013.7）、第四輯田庄囡仔紀事、第五輯田庄人氣紀事、第六輯田庄運氣紀事，逐輯攏有一本冊佮兩塊CD，目前已經出到第三輯，第四輯也當欲出來。阮真有福氣會當先讀著第五輯田庄人氣紀事收錄的六篇小說〈乞食庄的人氣者〉、〈鱸鰻松--仔〉、〈樂--仔的音樂生涯〉、〈痟德--仔掠牛〉、〈祖師爺掠童乩〉、〈純情王寶釧〉，佇遮來欲佮逐家分享阮讀完的感動。

陳明仁講伊是咧寫一種拋荒的價值觀，屬於咱台灣古典的農業社會發展出來的價值觀，伊講：「《拋荒的故事》我逐篇攏是用現代做起頭，才講一个五○、六○年代台灣農業社會的故事，透過故事，共本底台灣人所堅持的價值提來做比並，毋過比並是讀者讀了的空課，作者無佇文學進行中加話。經過比並，咱通了解，台灣社會環境佮生活所倚靠的條件提供咱啥物價值，造成台灣啥物性格，對遮，咱通理解未來台灣人佇傳統的下跤，咱欲怎建立新的台灣性格，這是台灣文化的大工事，我數想欲做疊磚仔角抑是鞏紅毛塗的地基。」佇第五輯田庄人氣紀事內底，確實予咱閣再拄著人情味厚厚的過去，古意、好禮、貼心的老台灣，慾望較低、感情真深的農村社會。

〈乞食庄的人氣者〉寫田庄的散凶人，雖然無錢通分予乞食，毋過乞食若來分，定著袂予伊空手離開，「若無予伊一管米嘛會予伊一條大條番藷。」拄著這款體貼的表現，乞食un仔攏會唱乞食調共人誠懇說多謝，袂認為逐家幫贊伊是該然的。最後作者呵咾un仔靠家己有品有格的求乞方式，骨力行過各庄頭，無倚靠序細，嘛無愛造成別人的困擾，毋但無枵死，閣愈行就愈出名，變做庄頭的人氣人物。

〈鱸鰻松--仔〉寫義氣閣有擔當的鱸鰻松--仔，因為伊定定替善良古意的做穡人出頭，致到伊過身出山的時陣，是規庄上鬧熱的。捌予伊鬥相共過的人，感念伊的善心，無因為伊是鱸鰻就看輕伊，最後閣送伊上山頭。鱸鰻松--仔家己嘛真謙虛，幫贊人攏袂要求報答，嘛袂四界展風神，閣勸囡仔人愛認真讀冊，甚至予囡仔錢欲共鼓勵，閣苦勸古意人毋通變做予祖公仔見笑的鱸鰻。

〈樂--仔的音樂生涯〉寫一直堅持追求家己合意的音樂的樂--仔，寫伊成功的過程，予咱感受著樂--仔正面積極的生活態度，無向命運、出身投降的樂觀。閣，有音樂天份的樂--仔最後會當成功，受著濟濟善心人士的鼓勵佮幫贊，作者寫甲真媠氣。

〈痟德--仔掠牛〉的主角德--仔是做人真誠懇，做穡頭誠拍拚。寫做田人對牛的疼惜佮感謝，予咱了解，為何咱台灣的種田人堅持毋食牛肉，因為，牛是做穡人的空課伴佮大恩人。寫德仔心愛的牛死去彼段，予人感受著人對牛的深刻的疼心：「死牛欲予人車去燒掉彼早起，德--仔一个人坐佇溝仔邊，看溝仔水攸攸仔流，風一陣一陣對竹仔尾搖--落來，共溝仔底的雲影佮紺的天挲甲一稜一稜，遮是伊逐工牽牛來餓浴的所在，伊放聲吼，袂輸死父死母彼款吼聲，共透早的田園罩一沿哀愁的濛霧。」

〈祖師爺掠童乩〉寫疼某的阿文哥，嘛寫出庄跤對神明虔誠的態度，主要是因為感謝神明照顧，毋是因為驚神明的神通才遐爾好禮。寫德--仔去拜託阿文答應予in某做童乩彼段，嘛真溫純樸實，兩个查甫人恬恬做伙佇田裡做穡，攏無講話，彼暗阿文閣問in某品--仔：「你敢欲做童乩？」規家伙嘛攏恬恬無應話，落尾，阿文就答應矣。遮寫甲真媠，有一種講袂出來的貼心佮溫柔。

〈純情王寶釧〉寫歌仔戲戲班演員阿霞勇敢追求幸福的過程，阿霞無願意做好額人莊書文的細姨，歡喜選擇散赤毋過古意的阿財，莊書文氣甲罵伊無情的時陣，伊閣真有智慧應講：「阮做戲--的上純情，你歌仔戲看遐久，敢毋知阮講是一女不配二夫！我都阿財的某--矣，欲按怎閣配--你？」

這馬的社會科技發達，人佮人透過網路抑是手機仔來溝通，資本主義社會的商業廣告一直咧叫醒逐家的慾望，咱身邊佮厝裡的物件愈買愈濟，咱佮人面對面眼神交流的開講愈來愈罕。親像這馬的大學，校園內底攏有WiFi，隨時會當無線上網路，有真濟大學生開父母的艱苦錢來大學註冊，敢是為著欲佇教室上課的時來滑手機仔？學問毋值錢，人佮人那來那生疏，這敢是時代進步的代價？鬱卒的時陣，心情tit欲拋荒，拍開《拋荒的故事》，走揣古意純真貼心的老台灣，思考咱島嶼的未來。