代序／林沈默
六十借劍
童年鑄劍，
江湖是一片牛草埔。
菅蓁葉軟軟、利險險，
臭頭囡仔捽甲面貓貓。
對日頭赤艷，
鬧到天星閃閃。
少年揹劍，
江湖是一堆武俠冊。
是非烏白、隨心發芽，
劍鞘出門、唯我獨尊。
毋知天偌懸？
地到底有幾斤？
文青試劍，
江湖是一窟醉月潭。
劍花如夢、恩怨交纏，
風也微微、雨也綿綿。
情仇斬袂離，
血絲誤染相思。
中年出劍，
江湖是一座絕魂嶺。
正邪兩道、追聲殺影，
刀光照路、快意賭命。
大戰百回合，
無人輸無人贏。
六十借劍，
江湖是一陣雪飄飄。
刀鋩鈍了、心頭猶擽，
將時只好參詳風獅爺。
寒氣變和氣，
冷兵器舞通宵。
──2025年5月21日「聯合副刊」
管芒
山頭、水尾、石頭仔縫，
有一股本土勢力。
為著官夢、
為著欲出頭天……
趴佇惡地，
暗暗發葉抽枝。
三春的時陣，
生湠出萬里翠青。
西風一起，
腰身軟軟，
搖來搖去、
舞狗舞豬，
雄雄獻出──
滿山遍野的白旗。
放眼看去，
無一欉是硬骨的。
──2010年4月5日「自由副刊」
////////////////////////
風塵煞
──人生人生，塗粉仔鬥爭。
風咧吹、
塵咧飛……
伊無閒拭跤手、
伊無閒拭衫衣、
伊無閒拭桌椅、
伊無閒拭車身、
伊無閒拭門面。
（四界攏是腌臢腌臢，
伊鐵齒硬牙欲和塗粉拚生死。）
風咧吹、
塵咧飛……
伊無閒拭腦智、
伊無閒拭年紀、
伊無閒拭名聲、
伊無閒拭權力、
伊無閒拭富貴。
（若像阿拉丁拭神燈，
伊拜託萬能的魔神仔逗保庇。）
伊欲滅塗粉、
伊欲出頭天。
伊欲做人上人、
伊欲𬦰天外天。
塗粉仔無講啥物，
重重疊疊，
恬恬寂寂，
一沿一沿對伊崁落去。
終其尾，
黃土一堆萬重圍。
風咧吹、
塵咧飛……
──2012年1月9日「自由副刊」
六十借劍
童年鑄劍，
江湖是一片牛草埔。
菅蓁葉軟軟、利險險，
臭頭囡仔捽甲面貓貓。
對日頭赤艷，
鬧到天星閃閃。
少年揹劍，
江湖是一堆武俠冊。
是非烏白、隨心發芽，
劍鞘出門、唯我獨尊。
毋知天偌懸？
地到底有幾斤？
文青試劍，
江湖是一窟醉月潭。
劍花如夢、恩怨交纏，
風也微微、雨也綿綿。
情仇斬袂離，
血絲誤染相思。
中年出劍，
江湖是一座絕魂嶺。
正邪兩道、追聲殺影，
刀光照路、快意賭命。
大戰百回合，
無人輸無人贏。
六十借劍，
江湖是一陣雪飄飄。
刀鋩鈍了、心頭猶擽，
將時只好參詳風獅爺。
寒氣變和氣，
冷兵器舞通宵。
──2025年5月21日「聯合副刊」
管芒
山頭、水尾、石頭仔縫，
有一股本土勢力。
為著官夢、
為著欲出頭天……
趴佇惡地，
暗暗發葉抽枝。
三春的時陣，
生湠出萬里翠青。
西風一起，
腰身軟軟，
搖來搖去、
舞狗舞豬，
雄雄獻出──
滿山遍野的白旗。
放眼看去，
無一欉是硬骨的。
──2010年4月5日「自由副刊」
////////////////////////
風塵煞
──人生人生，塗粉仔鬥爭。
風咧吹、
塵咧飛……
伊無閒拭跤手、
伊無閒拭衫衣、
伊無閒拭桌椅、
伊無閒拭車身、
伊無閒拭門面。
（四界攏是腌臢腌臢，
伊鐵齒硬牙欲和塗粉拚生死。）
風咧吹、
塵咧飛……
伊無閒拭腦智、
伊無閒拭年紀、
伊無閒拭名聲、
伊無閒拭權力、
伊無閒拭富貴。
（若像阿拉丁拭神燈，
伊拜託萬能的魔神仔逗保庇。）
伊欲滅塗粉、
伊欲出頭天。
伊欲做人上人、
伊欲𬦰天外天。
塗粉仔無講啥物，
重重疊疊，
恬恬寂寂，
一沿一沿對伊崁落去。
終其尾，
黃土一堆萬重圍。
風咧吹、
塵咧飛……
──2012年1月9日「自由副刊」
