〈羅生門 Lá-sioh-bóng〉

有一工的欲暗仔時，一个下人佇羅生門覕雨。曠闊的門樓下跤，這个查埔人以外，人影是無半个，只有一隻杜猴停佇咧紅漆落甲的大柱頂懸。羅生門𫞼踮朱雀大路，照理講上無嘛愛有兩、三个戴笠仔的查某人，抑是戴軟烏帽仔的查埔人佇遮覕雨才著，這馬干焦這个查埔人爾爾。是按怎呔會按呢咧？這兩、三冬，京都捌有地動、起捲螺仔風、飢荒等等的災害，京都城是變甲衰敗稀微。根據記載，有共佛像、佛具摃摃予歹，共內底的木材，毋管是漆紅漆的，抑是貼金箔仔的、貼銀箔仔的，攏提來排佇路邊做燃火用的柴來賣。規个城市的光景變甲遮爾仔悽慘，修理羅生門這款代誌，呔會有人關心咧！羅生門拋荒甲按呢，也是有好代誌：狐狸來蹛遮，賊仔嘛來矣，是連無人認的死體都提來擲，煞變成一个慣勢。就按呢，日頭若暗落來，只要是人就會感覺誠恐怖，羅生門這箍圍仔就無人敢倚來矣。

相對來講，毋知對佗位來的烏鴉，規大陣規大陣飛來遮。日頭時仔，有幾隻烏鴉咧畫圓箍仔，佇徛咧懸位的吻獸的四箍輾轉是那飛那吼。尤其是羅生門的天頂，予欲落山彼款紅記記的日頭光照著，一隻閣一隻的烏鴉袂輸糝烏麻仔，夆看甲清清楚楚。當然，烏鴉是欲來啄死體肉的──今仔日敢若是較暗矣，無看著半隻烏鴉，只賰一四界的崩塌。佇崩塌的石坎縫，雜草是發甲長lóng-lóng，石坎頂面全一點一點白色的烏鴉屎。下人坐佇七層石坎的上頂層，穿一領洗甲退色的紺色外袍，那咧注意伊正爿喙䫌彼粒大𤶃仔子，人踅神踅神咧看雨佇咧滴滴落。

拄才作者有寫著「下人是咧等雨停」，不而過，下人是等雨停了後，嘛無位通去。平常時仔是會當轉去主人的厝宅，煞毋知，伊四、五工前就去予主人辭頭路矣。頭前嘛有寫過，斯當時的京都是衰敗稀微，下人會去予伊服侍遐濟年的主人刣頭，定著是去予京都這回落坐的時勢來牽連著。所以，寫講「下人是咧等雨停」，應該是愛寫「去予雨縛牢的下人，無位通去，毋知是欲按怎」，毋才較合意。而且今仔日的天氣，是加減有影響著這个平安朝下人的感傷。雨是對申時開始落，到今猶是一點仔欲停的勢都無。現此時，下人該當愛煩惱明仔載欲按怎過──抑就是講，這款進無步、退無路是欲按怎解決？就按呢，想來想去捎無摠頭，朱雀大路拄才開始落的雨聲，伊才會敢若無聽著、閣敢若有聽著。

雨共羅生門包牢牢，對遠遠傳來「tsa̍h」的雨聲。欲暗仔的烏陰天沓沓仔罩落來，攑頭看起去門樓的厝頂斜斜吐出來的厝脊，烏雲一重一重都共罩牢咧矣。

想欲解決這時的進無路退無步，就袂當揀手段。若準欲揀手段，落尾干焦會餓死佇咧塗牆跤或者死路旁，死體就夆拖來羅生門，像狗仔按呢凊凊彩彩就夆擲掉。若準無欲揀手段──這是下人的想法，才會頭犁犁佇咧仝一條路來回思量，到尾仔來到現此時的這款地步。不而過，這个「若準」終其尾嘛是干焦「若準」爾爾，下人雖然是肯定「莫揀手段」這个想法，若是欲予這个「若準」有一个結局，以後佇只有選擇「做賊仔以外無別步」的時陣，伊只是會積極tik共肯定爾爾，就是無彼个勇氣去做。

下人拍一个大咳啾，紲落來是真食力徛起來。欲暗仔時的京都是冷甲需要火熥的季節矣，風敢若是佮烏暗講通和，全然無客氣吹對門柱的中間迵過去。停佇紅漆大柱的彼隻杜猴，毋知走去佗位矣？

下人那勼頷頸，那共金黃色內衫頂面所疊的紺色外袍的頷領搝予較懸，對門外的四箍輾轉共看一輾，想講看會當揣著一个通遮風閘雨、予人看袂著，閣通輕輕鬆鬆睏一暝的所在無？伊隨就眼著𬦰起樓頂彼支闊身漆紅漆的樓梯，頂懸若準有人，應該攏是死人。下人穿草鞋的雙跤就踏起去樓梯的上低層，那注意伊紮佇褲頭的武士刀刀殼，就莫予輾落去。

幾分鐘了後，欲𬦰起去羅生門樓頂的闊身樓梯中央，有一个查埔人身軀勼勼若貓仔，共喘氣聲忍牢咧，佇咧斟酌頂懸的動靜。自樓頂炤（tshiō）過來的微微光線，照著彼查埔人的喙䫌，短短的喙鬚，喙䫌有一粒孵膿（pū-lâng）的紅𤶃仔子。下人自頭就斷定樓頂是干焦有死人爾爾，樓梯閣𬦰兩、三層了後，看著樓頂有人咧點火，火敢若咧振動徙來徙去。這就是彼个搖振動的濁濁黃色光，炤著全是蜘蛛網的天篷反射出來的，予伊知影有人佇遐。這个落雨暝，會佇羅生門樓頂點火的，應該毋是一般人物。

下人若像蟮尪仔跕跤行（liam-kha-kiânn），𬦰到樓梯的頂懸層，身軀做伊共放予平，干焦共頷頸伸出去，膽膽去相頂懸的動靜⋯⋯