台文BONG報小說精選集(一)

序

關心卑微ê性命－－台語文學ê必要kap意義

廖瑞銘
 
一種信念、一件行動維持十年，有需要做回顧kap驗收ê khang-khuè。《台文BONG報》已經做十年--looh，檢采有朋友beh問講：這份雜誌出刊存在ê意義是啥？我ê答案是：培養新一代ê台語文學作家，傳續台灣文學ê性命。
 
咱若觀察進入21世紀ê台灣文壇，就會發現一个事實是：除了前輩台灣作家lân-san發表ê作品猶看會著台灣、鼻會著台灣味以外，新生代作家ê hia-ê華文作品攏 kap台灣無siánn-mih關係！咱實在m̄知beh用siánn-mih角度去共in囥tī「台灣文學」ê名下來討論。遮的新生代作家上大ê共同點是：In大部份攏無leh使用台灣在地族群母語，當然in 嘛攏無法度去觀察ta̍k族群母語ê生活kap故事，koh較免講母語書寫。台灣文學這階段ê內涵欠缺，ka-tsài拄好有台語文學創作來補thap。
 
1980年代中期開始戰後新一波ê母語復振運動，嘛帶動台語文學創作ê發展。台語作品上大ê特色就是：In ê內容絕對kap台灣有關係，尤其是kap土地、人民有對話。無需要討論，就一定是台灣文學。M̄-koh，較失禮，一般平面媒體無人beh刊台文作品，尤其是有羅馬字--ê，koh較無人愛。所以，台文作家為著發表作品，就陸續發行真濟台語雜誌；期刊，《台文BONG報》嘛是其中之一。
 
當初發行《台文BONG報》，阮就堅持一个信念：beh做一份「台語文學專門雜誌」。所以，無愛刊論理性、運動性ê文章。真安慰，這个信念到今猶koh維持tī--teh。
 
《台文BONG報》自開始就有幾个較固定ê專欄，像：BONG報小說、BONG報選詩、BONG報戲劇，是基本ê文學創作：「台灣人寫真」是傳記文學；「tshìn話bóng thn̄g」是講一寡舊民俗、舊khiàn-sńg；「笑破人ê喙」台語創作笑話。第62期開始增加「HAKKA屋家」專欄刊登客語文創作。另外，A-bóng ê hàm-kó、洪錦田ê短篇推理、楊允言ê「來去花蓮」kap「農村生活筆記」、黃晴美ê「追想四二四事件」等等攏予人真深ê印象。
 
台語文學是有現代化ê文學，伊符合「文學現代化」兩個要點：一个是「語言kap書寫一致」；一个是「以市民生活經驗kap感情為主體」。發表tī《台文BONG報》ê作品嘛攏有合這兩項精神，tī每一篇作品--nih，毋但會當看著台灣，嘛會當感受著咱對每一个卑微性命ê疼kap關心，這tsiah是咱台灣文學傳統上寶貴ê特色。
 
《台文BONG報》已經做十年出刊120期，刊--過ê作品、作家數量歹算--a。作品有合集出版ê作家有兩个，一个是阿仁ê《A-chhûn》、《Pha荒ê故事》；另外一个是清文ê《虱目仔ê滋味》。其中，阿仁ê作品koh有研究生共提來做碩士論文ê研究。除了這兩本已經有收--入-去ê作品以外，阮決定beh先編一本精選輯做紀念，嘛beh見證頂面所講ê精神，接續台灣文學ê傳統。
 
常在有朋友leh問講，lín出這款雜誌beh予啥人看？哪會一定愛用台語寫，koh堅持beh用這款漢羅濫寫ê方式？十年來我用過幾lō種回應ê方法，親像「實踐手寫台語文ê理念」、「參考日文ê書寫方法」、「tī教育部猶未決定一套台語書寫系統進前，暫時用按呢」，m̄-koh朋友嘛攏無啥會當理解，最近我koh揣著一个無仝款ê理由，就是：「阮beh關心卑微ê性命，所以需要用這款語言來書寫，而且koh會使避開中文ê交纏，展現台語文學ê特色kap必要性」。可能朋友嘛猶m̄是蓋同意，m̄-koh，我家己無意中揣著台語文學koh較深沉ê意義。今教育部總算公佈一套台語音標，真濟人無藉口koh再講「因為音標無統一，所以i無法度學台語、進行台語文學創作」。Tī 這時，beh祈禱這本精選輯會當吸引較濟人進入台語文學，甚且進一步加入台語文學創作ê行伍。