客語童話有聲書：阿姆～阿姆～天又落下來囉！

推薦序

一枚煎粄補天穿

張淑玲

客家「安徒生」捷明先生做阿公咧，緊來緊好講古，講个古緊來緊好聽。只愛大家愛聽，佢就輒常噩夜想愛變出餳人个作品，恁樣無閒洎杈係為着麼个呢？敢係佢應着客家个？好得捷明先生甘願做歡喜受，合緊做緊煞猛，正會人講个「湖鰍搵泥沙，緊搵緊大條」，變成客家界作品盡多个作家，正經係又期待又毋盼得捷明先生，總係創作好个文學作品分大家欣賞，為恩客家舂頭磕額。

這恁多年來，因爭客語復育有兜仔成績，肯用又曉用客語漢字書寫个作者加盡多，堆山塞海个作品乜分大家看到眼茫鼻花。毋過，這擺定着愛紹介佢這本盡無共樣个《阿姆～阿姆～天又落下來囉！》有聲童話書。

天穿日這客家當傳統个節日，對老頭擺个神話傳說講起，總係分大家當多个想像，毋過捷明先生認為天穿日有客家儆惜、惜福个優良觀念，又做得連接積極个時代環保意義，尤其係分過年期間無閒个大人有一隻無共樣个放尞日，確實係值得推廣个。

天穿日个神話傳說正經當生趣，毋過捷明先生為著分儆惜、惜福、環保、現代這兜意象做得充分連結，故所創造吔一隻新个天穿日故事，希望為着傳承兒童客家文學摎客語閱讀，編寫新面向个作品。除了用生趣个故事分細人仔認識客家傳統外，還有加入當多探討个話題，比論講：好食甜粄个阿明，同會打甜粄个阿姆，兩子哀有辦法補天無？無成阿明乜會補天穿？愛用麼个補喏？係用強力膠補無？抑係用甜粄補？又愛從哪補起勢喏？這一千擔的難題愛仰結煞喏？該斯愛看故事尋答案喔！

記得細細該下涯聽過阿公講个古……佢講頭擺頭擺女媧做人，又還愛代人類做媒人，故所變做係人類最早个阿姆。有一年水神共工摎火神祝融相打，共工打輸毋甘願就撞橫不周山，天崩下來、地也必忒，地泥變做海洋，女媧就負責煉石補天，解救人類，正有這客家人特別个節日──正月二十天穿日。就係為着感念女媧分人類个重生，愛承蒙女媧娘。阿公還會唸宋朝詩人李覯个詩句講：「一枚煎粄補天穿」，就係形容客家人過天穿个情形。宋朝以前个風俗，係用紅線䌈等甜粄擲到屋頂項，安到「補天穿」。

捷明講咧恁特別个天穿故事，你會聯想着麼个？涯還想着浪漫又感動人个古典小說《紅樓夢》又安到《石頭記》，故事裡背作者曹雪芹所寫个賈寶玉，原來係青埂峯下个一垤補天無分人選着，盡尾修練成仙个石頭，乜就係女媧補天所伸下來个該粒無用着个石頭，包尾正有這個摎林黛玉在靈河脣个木石情。這兜靚靚个古摎小說，係毋係分無閒又生活緊張个現代人加添一兜仔浪漫啊！儕儕會想着个就會無共樣，文學个美好就係學習摎想像，承蒙捷明先生又渡等兜去看客家文學最新最靚个風景。