阮家族的根源

　　我是1952年出世的，佇世間已經活超過70年，我這世人有袂少佮一般人無啥仝款的性命歷程，可能有人會感覺心適，我想欲用一系列的短文，來佮有興趣的人交流。
　　頭起先欲來講阮家族是按怎會移民來臺灣的。照阮老爸的講法，阮兜佇廣東的白頭山是在地的大地主，田園厝地規大片。毋過俗語講，富袂過三代，佇阮阿公進前，錢銀就已經敗欲空矣，手頭干焦賰一寡田佮厝。阮阿公少年的時猶是阿舍，規工毋讀冊，上愛佮人拍拳頭，練功夫。
　　因為阮原本是地主，有土匪想講阮兜猶有錢通撚，有一工就共阮阿公掠去，叫阮阿祖愛提錢去共贖轉來。阮阿祖無地傱錢，當咧煩惱，阮阿公已經趁顧伊的人干焦賰兩个，用伊練過工夫的跤手，共彼兩个土匪拍甲毋知人，家己走倒轉來矣。
　　自按呢阮阿公成做白頭山的阿哥，受著兄弟的敬重。阮阿公規工跋筊、𨑨迌，無偌久，因為輸筊欠袂少數，阮兜的田、厝就攏抵押出去，生活愈來愈艱苦過。阮阿媽因為無錢通過日，開喙共阮阿公討生活費。阮阿公見笑轉受氣，出手拍阮阿媽。可憐一个營養不良的查某人就按呢帶傷，閣無錢通予先生看，無偌久就過身矣。
　　阮阿公感覺佇故鄉已經袂當生存，就決定欲過番去新加坡，看會當佇無人捌伊的所在重頭開始無。阮阿伯彼陣已經娶某生囝，伊嘛佮阮阿公仝款，若阿舍咧，自本就無咧做正經頭路。看老爸做伊走去新加坡，伊嘛有樣看樣，某囝放咧，嘛走去新加坡。
　　阮老爸原本去佇汕頭咧綴人學師仔做塗水，因為趁無食，就想欲綴老爸、大兄的跤步，嘛去新加坡揣出路。探聽了後才知影阮阿公、阿伯佇新加坡袂適應，已經閣走去臺灣矣。阮老爸聽人講臺灣的錢像鼎崁遐大，就決定欲來臺灣，看會當趁著錢，轉去白頭山，共阮阿公抵押出去的田、厝討倒轉來袂。
　　就按呢阮兜兩代人，佇日本時代，前後提中華民國的護照，申請來臺灣做外籍移工，搬徙來臺灣。
　　阮老爸拄來臺灣，捌去佇花蓮予人倩做包仔店的辛勞，因為工資無懸，就綴同鄉走去基隆做碼頭工人，看有通趁較濟錢無。尾仔阮老爸就佇基隆佮阮老母結婚，這就是我出世佇基隆的因由。阮老母是按怎會佮對廣東來的阮老爸結婚咧，後一篇我才來共逐家講阮老母彼家伙仔是按怎來臺灣的。


阮阿舅

　　阮外公出海發生海難無閣轉來，阮阿舅就無閣讀冊，出社會做賣魚的生理。伊原本是擔擔四界去賣，後來就佇基隆的大菜市租一个擔仔位賣，生理愈來愈好，就開始做大賣。到尾仔毋但佇基隆賣，閣共漁貨配去中南部賣。
　　趁著錢了後，閣開始做魚仔加工的生理，買一間透天厝，樓頂做徛家，樓跤做工場，用較無好銷的魚仔拍魚漿做魚丸、thian-put-lá 銷去臺灣各地。有一段時間伊嘛佮人份炭空，毋過彼陣炭空已經無真好做，上尾彼部份並無趁著錢。
　　因為生理無閒，阮阿妗嘛愛佇菜市仔賣魚，囡仔的教育較無時間通管顧。阮表兄（阮阿舅的大漢後生）十四、五歲就草踏佇(in)兜咧鬥做魚丸的查某囡仔，阮阿舅氣一下共送去讀關少年犯的學校，予伊蹛遐讀國中佮高中。畢業考牢大學才共放出來。因為無時間通管教囡仔，尾仔囡仔攏送去讀會當蹛校的私立學校。
　　阮阿舅因為全臺各地攏有生理，不時愛四界去巡頭看尾兼收數，佇嘉義就鬥著一个賣魚的查某人。彼个查某人家己袂生，有分一个查埔囡仔來飼。這層代誌本來阮阿妗攏毋知，毋過阮阿舅因為應酬濟，不時食酒醉，身體拍歹愛蹛院治療。醫生講伊的膽已經失效，愛手術割掉，需要蹛院一段時間。因為阮阿妗愛做生理，就希望阮老母會當去顧阮阿舅。阮老母共阮阿舅講：「我一家一業就顧袂去矣，哪有才調顧你。你叫阿綢來共你顧。」阿綢就是嘉義彼位阮阿舅的細姨。
　　阿綢來顧阮阿舅了後，阮阿妗佮阮阿舅冤甲足厲害，上尾無法度嘛著接受。阮阿舅出院了後，安排阿綢佇阮阿妗的對面閣排一擔賣魚仔、魚丸。兩个大某細姨佇菜市仔隔一條街咧做仝款生理，定定那做生理那相罵。阿綢𠢕做人，手腕好，生理加足交易。伊秤魚丸的時攏先提無夠，上磅仔了後才閣添甲到予人客，人客攏感覺伊有加添一寡。阮阿妗攏會提較加去秤，上磅仔才閣提幾粒仔出來，人客攏感覺予人偏去，所以攏較愛共阿綢買。
　　大某細姨兩个人原本冤甲足厲害，想袂到食老了後，阮阿妗身體無好，煞著靠較少年的阿綢來照顧伊。彼時陣(in)兩个蹛頂下層，阿綢一个愛顧阮阿舅佮阿妗，嘛是足忝。到上尾阮阿妗先過身，過無幾年阿綢嘛去做神，干焦賰阮阿舅活到九十幾歲。阮阿舅佇基隆有足濟間店面咧收厝稅，伊過往的時，阮去參加伊的喪禮，竟然攏無啥物人來拈香。阮表兄嘛無出現，聽講(in)兄弟仔為著財產的分配嘛咧冤家。看起來放傷濟財產予序細，嘛無定著逐家就攏會足快樂。佳哉阮彼幾个表兄弟仔逐家攏真有出脫，有一个對銀行退休，兩个是高職等的公務人員退休，一个咧做會計師兼股票分析師。