1 揣路
真久　無轉去故鄉
細漢行過的路　有一點仔
生疏　盤過田園的高架公路
紅毛塗柱　真大箍
高速公路的交流路口
迵入　過去阮兜的田園
揣無阿母為青菜梳妝的身影
真久　無轉去田庄
路頂的少年家仔　有淡薄仔
生份　囡仔兄　借問
陳村長的厝按怎行？
伊的靈已經搬去穎川堂的公廳
墓仔　做佇林頭崙的山坪
恬恬咧聽　九降風的嗽聲
日治時代　開挖的四知圳
圳水　流過春天的田園
白雲　巡過一庄閣一庄
風聲叫著　白翎鷥緊起床
暗光鳥　已經飛倒轉
阮向少年鄉親借問
收驚婆仔　猶閣有踮咱這庄？
揣無故鄉孰似的　人
細漢踮過的　厝
失落佇　田中央
回鄉的路　愈來愈長
揣路　予阮心頭
酸……

22 賴和的相思
一九三○年　鄉土論戰的時陣
先賢有講　舌頭佮筆尾愛合一
用家己的手寫家己的　喙
和仔仙佇一九三二年　伊寫
相思歌　為著等愛人
心頭亂紛紛　心情悶悶悶
規暝　星稀微月走去覕
風真涼　露水凍吱吱
相思樹下　孤孤單單　等無愛人來做伴
相思　啊　相思　恨無身軀生出翼股
飛入　愛人的房間內
鬥鬧熱走唱隊　開出　一條歷史民歌的　河
每年的五月二十八日
唱出詩醫賴懶雲的心聲
佇低氣壓的　八卦山頂
複習　日頭光曝的疼痛
南國哀歌　屠殺的悲慘
蔗農　覺悟下犧牲的心情
佇一个無星光的　暗暝
兄弟手牽手踮烏暗中　前進
毋管　透大風　落大雨
雷公　閃爍Pin　póng　kiò
逐家共同喝著
光明前途佇咱的頭前
前進　前進　
這就是阮對和仔先的相思

23 百鳥朝梅揣祖師
長福巖上　烏面的清水祖師
十八世紀對中國　一葦渡海過台灣
落籍三角湧　一九四七年
三峽　冷霜的風中有一欉梅樹
種入　祖師廟的內底　𤆬來
一百隻名貴的鳥隻　創造出
台灣人　高貴閣樸實的心靈
日本留學的畫家　李先生
佇祖師廟第三次改建的時
籤詩飛來跤邊寫著　頂上一枝春
暗示　梅樹接任廟宇改建責任
在地人為家己鄉親做代誌
用伊的觀點　招台灣的藝術大師
共同打造東方的藝術廟堂
將日本鳥居拆落的大木材
刻成一百隻鳥仔的兩支梅柱
梅樹招藝壇大師予飛羽入廟堂
陳進的暗光鳥（夜鷺）　郭雪湖的喜鵲
黃昌惠的釣魚翁（翠鳥）　陳慧坤的綠頭鴨
陳丹誠的八哥　林玉山的白翎鷥
木雕大師李松林　黃龜理攏留下in的作品
真濟寫袂了的先輩……
成就三峽祖師廟　有鳥廟雕刻的藝術
這間　台灣先輩打造的雕刻博物館
祖師廟　咱來走揣台灣人的藝術英雄
廟中　有對中國來的傳說故事
有台灣人生活中的民俗文化
充滿台灣人的價值觀念
是認捌台灣人的心靈故鄉
咱袂使看輕家己　對台灣這塊土地
愛有信心　有愛念　有責任　傳承落去