一枝針、一條線，紩出庄仔頭溫暖 ê 感情線。
一枝鉸刀、一條布尺，量出咱人之間 ê 寸尺。

美麗ê庄頭，四季開了無仝款 ê 花，
有一間西裝店，
是阿長師逐工替逐家紩出幸福記憶 ê 西裝店。

「阿長師」、「阿長師」
逐家攏呵咾阿長師是庄頭內技術上好 ê 西裝師傅。
人客毋管是懸抑是矮、是大箍抑是瘦，
伊總是有法度替𪜶量做合軀閣體面ê西裝。

春天，百花齊開，
庄頭四界攏是花蕊甜甜 ê 芳味，
種花 ê 阿土伯，厝內準備欲娶新婦，
請阿長師替伊量做一套喜氣閣氣派ê西裝。

阿長師詳細替伊揀選適合ê布料佮色水。
用尺將伊ê身軀量了閣量，詳細記錄每一个寸尺。
閣用粉塗佇布面畫線。
鉸刀khah-tshah、khah-tshah，熟手鉸出逐塊布形。
針線紩出紩入、一針一線將喜氣 ê 西裝紩出來。

娶新婦這一工，穿著這軀西裝ê阿土伯歡頭喜面，
緣投閣大範，享受著逐家滿滿ê祝福。…….