廟街買校服，九公捉伊人

我由細到大都住佐敦，南京街、廟街一帶我熟晒。起初我間屋係租嘅，到八十年代有大集團收購咗我哋棟樓，叫我哋買咗佢，我哋屋企人比較多，阿爸阿媽加五兄弟姊妹，老豆覺得我哋住返喺度會舒服啲，就買咗間屋分十年供，自己做多幾份工搵錢，阿媽同我哋五兄弟姊妹就一齊喺屋企黐膠花，雖然辛苦，但係生活得好開心。大家姐最早出嚟做嘢，大佬中五後都出嚟做嘢幫補家計，我就中三開始做兼職。

廟街乜都有，好多最新嘅衫褲鞋襪，連買件校服都有型啲，校服褲有兩個褶或三個褶。有一次我去買校服褲就同個老闆講，一陣我會同阿媽一齊嚟買，我阿媽實會講價，條褲原價65蚊，你同佢講100蚊，最後收返佢65蚊就得啦，你又唔使蝕本，我又買到條褲。結果我同阿媽去到，阿媽去到果然叫人「平啲、平啲」，我同老闆打個眼色，原價成交，奸計得逞。
由佐敦跑去尖沙咀好近，我同一班小學中學同學仔就成日跑去九龍公園踢波，嗰陣九龍公園有兩個足球場，我同班鄉里去跟隊，初頭我係打前鋒嘅，後來開始唔夠氣就轉去守龍，隊友見我打得幾好，好過打前鋒咁獨食，我就一直守龍，嗰陣都算係鋼龍。近年工作忙，韌帶又受咗傷，就好少踢波啦。除咗踢波我都有打曲棍球，仲係懲教嘅代表隊，成績都唔錯，算係甲組尾乙組頭，通常一年打乙組打到冠軍，升班到甲組第二年又降班。九龍公園其他角落我都玩勻晒，平日阿爸阿媽會帶住成家人去散步、睇風景。我同一班朋友都會喺九龍公園周圍玩，跑來跑去，玩何濟公、伏匿匿、捉伊人。重慶大廈係另一個我哋成日去嘅地方，喺重慶食咖哩比出面抵啲又地道啲，不過其實我哋唔係成日出街食飯，始終一家七口喺屋企買餸煮飯平好多，你哋可以留意下，喺出面嘅餐廳酒樓好少會見到我哋啲鄉里。阿媽係家庭主婦，多數都係煮印度菜，不過其實我鍾意食Chinese food多啲，阿媽間中會煮公仔麵，加啲白菜、芥蘭、雜豆、魚蛋，或者炒飯炒麵，我哋唔食蝦、牛，但可以食豬肉，或者買啲叉燒，我都一定清晒，覺得好正，反而煮印度菜會食剩。去重慶另一個目的就係租錄影帶睇，嗰陣仲係VHS年代，但我哋屋企冇錄影機，就會去重慶租啲印度片去人哋屋企睇，印度電影業都幾發達，每日都有一至三套電影，香港嘅電視台當年星期日下晝都會播印度片，我哋拜完神返屋企就會睇。我其實更鍾意睇香港電影，鍾意睇李小龍、成龍、許冠傑、周星馳，但屋企人鍾意睇印度片，我一個人邊夠佢哋爭？想睇香港電視劇更加唔使旨意，屋企電視好難爭，老豆返屋企會睇英文新聞台，睇完就到老媽子大佬家姐睇印度片。

老豆一個月都會帶我.一家人出去玩一次，荔園、海洋公園都去過好幾次，掟銀仔、過山車、水族館、100米高空跳水、殺人鯨等等都係我細個好開心嘅回憶。當年沙田仲係好偏僻嘅地方，老豆有時會帶我哋去沙田食中國嘢，價錢比市區平好多，燒賣、腸粉、炒飯、炒麵我都好鍾意食。