這本冊是文學冊。我的思考攏是對台語文學出發，才想看欲按怎予讀者自學、教學、認證、競賽。自在使用，自由選擇。
音字是台語的鎖匙，特別是台羅拼音系統若有夠熟，就會當享受台語的媠佮趣味。毋過有當時仔，若像會曉講，煞無夠精確呢！所以我才會想欲出這本音韻詩，陪伴有緣的人共台語音舞予清楚。
冊名叫做《阿烏會學游》正是咱台語的六个主韻母「a-oo-e-o-i-u」。照發音的響度大細的順序，我有編一个故事，嘛是標調號位置的口訣，「a 上大，阿烏會學游，烏糖囥頭前，游對後壁去」。故事咧講「阿烏皮膚烏烏，是一个古錐囡仔，去學游泳。獎品是烏糖，囥佇頭前，啊伊哪會游去後壁咧？」逐擺等我共短短的故事講了，學員就已經共台羅標調號的原則記起來矣，閣袂拂毋著去。有故事的學習，好耍閣好記。
這本故事音韻詩攏總有25 篇，照台羅音韻系統的順序，仝韻字鬥句，寫我家己感覺趣味的故事。第1 到第6 篇是單韻母a、oo、e、o、i、u；第7、第8 篇是雙韻母ai、au 來共音發予滿，莫貧惰；第9 篇iau 說明拼音原理愛對後壁去掠頭前；第10 篇是欲予北部腔講凡講，若欲寫o 袂當予oo騙去；第11、12、13 篇是三个鼻音m、n、ng，欲予逐家體會佮判斷『合起來、上、下』、『合起來、小、大』的四組發音位置的系統佮規律，嘛欲予入聲韻做準備；第14、15 篇是提醒鼻音內底的m、ng 會當做韻母；第16 篇是咱台語足特別的鼻化韻ann、onn、enn、inn、unn；第17、18、19 篇是練習共介音i 發予清楚；第20、21 篇是入聲p、t、k、h；第22 篇是入聲韻h 有分ooh 佮oh；第23 篇是欲予讀者慣勢省略一粒『o』的複合音；第24、25 篇是學台羅拼音的時，誠濟人發袂穩的音，欲予你的舌佮鼻仔通較伶俐咧。共這25
首詩好好仔聽音檔練習，發音的位置佮氣流的行徙掠予清楚，發音會較精確，閣較有自信。
這25 篇故事是詩，是歌，嘛是唸謠。閣攏有鬥句，欲予讀者讀起來若咧唱歌順順順。語文的學習愛要意精確，出這本冊的本意是欲幫助逐家聽音、辨音、記音、發音，一理通萬理徹。逐个音會當閣較自然，閣較滑溜咧，毋是凊彩發、用準的。這本冊嘛是故事冊，一个音有一个主角，故事內底攏有藏女性的形影，攏會當融入「十二年國民教育素養教學課程綱要」的十九項議題。每一篇攏有我錄的音檔，逐篇掃QR Code 我就唸予你聽。
我創作的時，心內想的攏是台語、文學、教學、認證佮競賽，我驚詩的漢字無夠、傷短，所以有「全台羅」對照，欲予逐家體會音韻的趣味、音字的對應，嘛欲予逐家練拼音、拼寫佮連結符按怎用。逐篇有十个「語詞註解」，會使耍音字聽寫、練習造句佮口語表達；有「華台英袂花去」的字圖典、「華台英三語俗諺快譯通」，會當予你多元語言學習；有「問題討論」，通予你語文競賽抑是認證考試做練習；有對應第一條提問的「應答短文」，用散文書寫秀容觀察的時事、故事佮心事，就是共恁當做朋友咧開講的意思。閣有懸層次的挑戰，記漢字上好用的「漢字克漏字」，嘛有大挑戰的「台羅克漏字」。共音檔的速度調予好勢，家己練習抑是提來教學佮評量，攏通百面用。開店毋驚人大食，主編講：「傷濟矣啦！」我講：「詩的本文」共排予古錐，賰的攏通掃 QR Code 在人掃、在人佮意。
感謝阮查某囝林芸瑄小姐，國立臺北藝術大學美術系畢業的青春藝術家替這本冊畫插圖。每一首詩設計四幅圖，共故事連結起來，所以會使用來練情境演說佮看圖講話。逐篇「音字袂花去」的語詞，會用小圖予恁看圖分辨音字。台語媠閣趣味，予台語冊有音、有字、有圖、有藝術味，看著冊就歡喜，逐工都想欲講台語。
感謝文化部予我補助，我才有機會出第三本冊為台語文拍拚。感謝前衛出版社林文欽社長的支持、鄭清鴻主編的專業編輯，足濟文本、資料佮音檔連結幼路的工課，有主編佇咧就無問題。感謝恩師李勤岸教授做這本冊的顧問，予我閣較有信心，伊是我寫作的燈塔。感謝守／酒台語社的先輩佮沙龍晤的兄姊，有幾篇我捌唸予𪜶聽過，多謝𪜶予我寶貴的建議。感謝頂真的國賽音字金牌得主顧怡君老師陪我校稿。感謝故事內底的親情五十佮好朋友，恁予我生活豐富有故事。逐篇故事攏有後壁的故事。感謝親愛的阿母、伨我的兄姊、老實的翁婿佮兩个貼心的寶貝查某囝。「阿烏會學游」的原型是阮翁肉烏烏，伊煬講太平洋是伊的游泳池，阮查某囝彼陣嘛拄好咧學泅水。人生就是按呢，每一項記持攏有可能成做文學書寫的趣味。咱做伙來熟手音字，聽出語意，講出幼膩，讀出文味，寫出心意，做伙傳承台語文的媠佮趣味！
1. a｜阿媽蹛佇花蓮的庄跤
A-má Tuà tī Hua-liân ê Tsng-kha
阿媽蹛佇花蓮的庄跤
後壁埕有飼六隻烏鴨
頭前埕有種三欉芋仔
閣有大欉樹仔好蔭影
樹頂飛來十隻烏鴉
對天光透早到日頭落山
不時都咧 啊 啊 啊
A-má tuà tī Hua-liân ê tsng-kha,
Āu-piah-tiânn ū tshī la̍k-tsiah oo-ah,
Thâu-tsîng-tiânn ū tsìng sann-tsâng ōo-á,
Koh ū tuā-tsâng tshiū-á hó ǹg-iánn.
Tshiū-tíng pue lâi tsa̍p-tsiah oo-a,
Uì thinn-kng thàu-tsá kàu ji̍t-thâu lo̍h-suann,
Put-sî to teh ah ah ah.
烏鴉誠實有夠吵
吵甲阿媽氣掣掣
攑來鳥擗欲共嚇
相準烏鴉欲共彈
Oo-a tsiânn-si̍t ū-kàu tshá,
Tshá kah a-má khì-tshuah-tshuah.
Gia̍h lâi tsiáu-phia̍k beh kā hánn,
Siòng tsún oo-a beh kā tuānn.
彼時烏鴨行倚伊的跤
阿媽毋但拍著驚
家己的跤煞踏著烏鴨的跤
踏甲烏鴨連紲叫六聲
樹頂的烏鴉嘛著驚 隨喝 啊 啊 啊
逐隻飛甲無看見影
Hit-sî, oo-ah kiânn uá i ê kha,
A-má m̄-nā phah-tio̍h-kiann,
Ka-tī ê kha suah ta̍h-tio̍h oo-ah ê kha,
Ta̍h kah oo-ah liân-suà kiò la̍k siann.
Tshiū-tíng ê oo-a mā tio̍h-kiann, suî huah ah ah ah.
Ta̍k-tsiah pue kah bô khuàinn iánn.
呱 呱 呱 呱 呱 呱
趕趕趕 趕趕趕
阿媽趕鴨去後壁埕
紲落 踏入灶跤 喝欲啉茶止喙焦
Kuā kuā kuā, kuā kuā kuā,
Kuánn kuánn kuánn, kuánn kuánn kuánn,
A-má kuánn ah khì āu-piah-tiânn,
Suà--lo̍h, ta̍h ji̍p tsàu-kha, huah beh lim tê tsí tshuì-ta.
阿媽茶啉煞 目睭一下看
哎喲喂啊
六隻烏鴨無人看
哪會閣走來頭前埕
才一觸久仔
慘矣 烏鴨共三欉芋仔食甲焦焦焦
A-má tê lim suah, ba̍k-tsiu tsi̍t-ē khuànn,
Ai--iō-uê--ah,
La̍k-tsiah oo-ah bô lâng khuànn,
Ná ē koh tsáu lâi thâu-tsîng-tiânn?
Tsiah tsi̍t-tak-kú-á,
Tshám--ah, oo-ah kā sann-tsâng ōo-á tsia̍h kah ta-ta-ta.
這聲
阿媽是欲按怎較好啊？
Tsit-siann,
A-má sī beh án-tsuánn khah hó--ah?
【華台英俗諺快譯通】
台：豬頭毋顧，顧鴨母卵。
Ti-thâu m̄ kòo, kòo ah-bó -nn̄g.
華：本末倒置。
英：Don’t put the cart before the horse.
【問題討論】
1. 你喙焦的時較愛啉啥物？為啥物？
2. 你較佮意蹛都市抑是庄跤？為啥物？
3. 你敢有心愛的物件予人舞歹去的經驗？請講出情形佮想法。
【應答短文】
我喙焦的時較愛啉滾水、茶米茶抑是果汁，其中我上愛啉滾水。
有人講滾水白汫無味，毋過我感覺上單純、上讚。水四界攏有，閣俗，揹仔內底若紮一支茶鈷，喙焦就通揣飲水機入水啉。閣因為我教冊佮興趣的工課定定愛用著嚨喉，拉圇仔燒的滾水，半燒冷仔半燒冷上拄好。因為有滾水潤喉，到今我的聲音閣保持甲袂䆀。
我嘛會啉茶米茶，伊無啥方便閣淡薄仔貴，上興毋過無逐工啉。我佮意彼款苦甘仔苦甘、順喉的滋味。啉著高山茶米，人隨飛去懸山1500 米，規个人會予大自然的美景箍入去。
我嘛誠愛啉果汁，因為我是果子國的。食飯飽，規盤的果子照常共推落去，才會感覺五臟六腑有平衡。有當時仔無閒規工，無食著果子閣會數念呢！所以我定定點果汁來啉。毋過聽健康專家講果汁攏糖較濟，嘛警告講我這款定定拍電腦、坐鬱過久的，愛撙節好勢。酸微仔酸微的果汁會礙胃溢剌酸，我驚無踏擋仔，會變成惱氣的火燒心，只好改改咧較規氣。
所以，遮改遐改，改甲賰滾水佮茶米茶啦！單純的滾水，啉久嘛甘甜。自然、方便上歡喜。啊若欲體會人生的苦甘仔甜，當然嘛是啉茶米。看心情佮環境啦！我兩項攏佮意。
音字是台語的鎖匙，特別是台羅拼音系統若有夠熟，就會當享受台語的媠佮趣味。毋過有當時仔，若像會曉講，煞無夠精確呢！所以我才會想欲出這本音韻詩，陪伴有緣的人共台語音舞予清楚。
冊名叫做《阿烏會學游》正是咱台語的六个主韻母「a-oo-e-o-i-u」。照發音的響度大細的順序，我有編一个故事，嘛是標調號位置的口訣，「a 上大，阿烏會學游，烏糖囥頭前，游對後壁去」。故事咧講「阿烏皮膚烏烏，是一个古錐囡仔，去學游泳。獎品是烏糖，囥佇頭前，啊伊哪會游去後壁咧？」逐擺等我共短短的故事講了，學員就已經共台羅標調號的原則記起來矣，閣袂拂毋著去。有故事的學習，好耍閣好記。
這本故事音韻詩攏總有25 篇，照台羅音韻系統的順序，仝韻字鬥句，寫我家己感覺趣味的故事。第1 到第6 篇是單韻母a、oo、e、o、i、u；第7、第8 篇是雙韻母ai、au 來共音發予滿，莫貧惰；第9 篇iau 說明拼音原理愛對後壁去掠頭前；第10 篇是欲予北部腔講凡講，若欲寫o 袂當予oo騙去；第11、12、13 篇是三个鼻音m、n、ng，欲予逐家體會佮判斷『合起來、上、下』、『合起來、小、大』的四組發音位置的系統佮規律，嘛欲予入聲韻做準備；第14、15 篇是提醒鼻音內底的m、ng 會當做韻母；第16 篇是咱台語足特別的鼻化韻ann、onn、enn、inn、unn；第17、18、19 篇是練習共介音i 發予清楚；第20、21 篇是入聲p、t、k、h；第22 篇是入聲韻h 有分ooh 佮oh；第23 篇是欲予讀者慣勢省略一粒『o』的複合音；第24、25 篇是學台羅拼音的時，誠濟人發袂穩的音，欲予你的舌佮鼻仔通較伶俐咧。共這25
首詩好好仔聽音檔練習，發音的位置佮氣流的行徙掠予清楚，發音會較精確，閣較有自信。
這25 篇故事是詩，是歌，嘛是唸謠。閣攏有鬥句，欲予讀者讀起來若咧唱歌順順順。語文的學習愛要意精確，出這本冊的本意是欲幫助逐家聽音、辨音、記音、發音，一理通萬理徹。逐个音會當閣較自然，閣較滑溜咧，毋是凊彩發、用準的。這本冊嘛是故事冊，一个音有一个主角，故事內底攏有藏女性的形影，攏會當融入「十二年國民教育素養教學課程綱要」的十九項議題。每一篇攏有我錄的音檔，逐篇掃QR Code 我就唸予你聽。
我創作的時，心內想的攏是台語、文學、教學、認證佮競賽，我驚詩的漢字無夠、傷短，所以有「全台羅」對照，欲予逐家體會音韻的趣味、音字的對應，嘛欲予逐家練拼音、拼寫佮連結符按怎用。逐篇有十个「語詞註解」，會使耍音字聽寫、練習造句佮口語表達；有「華台英袂花去」的字圖典、「華台英三語俗諺快譯通」，會當予你多元語言學習；有「問題討論」，通予你語文競賽抑是認證考試做練習；有對應第一條提問的「應答短文」，用散文書寫秀容觀察的時事、故事佮心事，就是共恁當做朋友咧開講的意思。閣有懸層次的挑戰，記漢字上好用的「漢字克漏字」，嘛有大挑戰的「台羅克漏字」。共音檔的速度調予好勢，家己練習抑是提來教學佮評量，攏通百面用。開店毋驚人大食，主編講：「傷濟矣啦！」我講：「詩的本文」共排予古錐，賰的攏通掃 QR Code 在人掃、在人佮意。
感謝阮查某囝林芸瑄小姐，國立臺北藝術大學美術系畢業的青春藝術家替這本冊畫插圖。每一首詩設計四幅圖，共故事連結起來，所以會使用來練情境演說佮看圖講話。逐篇「音字袂花去」的語詞，會用小圖予恁看圖分辨音字。台語媠閣趣味，予台語冊有音、有字、有圖、有藝術味，看著冊就歡喜，逐工都想欲講台語。
感謝文化部予我補助，我才有機會出第三本冊為台語文拍拚。感謝前衛出版社林文欽社長的支持、鄭清鴻主編的專業編輯，足濟文本、資料佮音檔連結幼路的工課，有主編佇咧就無問題。感謝恩師李勤岸教授做這本冊的顧問，予我閣較有信心，伊是我寫作的燈塔。感謝守／酒台語社的先輩佮沙龍晤的兄姊，有幾篇我捌唸予𪜶聽過，多謝𪜶予我寶貴的建議。感謝頂真的國賽音字金牌得主顧怡君老師陪我校稿。感謝故事內底的親情五十佮好朋友，恁予我生活豐富有故事。逐篇故事攏有後壁的故事。感謝親愛的阿母、伨我的兄姊、老實的翁婿佮兩个貼心的寶貝查某囝。「阿烏會學游」的原型是阮翁肉烏烏，伊煬講太平洋是伊的游泳池，阮查某囝彼陣嘛拄好咧學泅水。人生就是按呢，每一項記持攏有可能成做文學書寫的趣味。咱做伙來熟手音字，聽出語意，講出幼膩，讀出文味，寫出心意，做伙傳承台語文的媠佮趣味！
1. a｜阿媽蹛佇花蓮的庄跤
A-má Tuà tī Hua-liân ê Tsng-kha
阿媽蹛佇花蓮的庄跤
後壁埕有飼六隻烏鴨
頭前埕有種三欉芋仔
閣有大欉樹仔好蔭影
樹頂飛來十隻烏鴉
對天光透早到日頭落山
不時都咧 啊 啊 啊
A-má tuà tī Hua-liân ê tsng-kha,
Āu-piah-tiânn ū tshī la̍k-tsiah oo-ah,
Thâu-tsîng-tiânn ū tsìng sann-tsâng ōo-á,
Koh ū tuā-tsâng tshiū-á hó ǹg-iánn.
Tshiū-tíng pue lâi tsa̍p-tsiah oo-a,
Uì thinn-kng thàu-tsá kàu ji̍t-thâu lo̍h-suann,
Put-sî to teh ah ah ah.
烏鴉誠實有夠吵
吵甲阿媽氣掣掣
攑來鳥擗欲共嚇
相準烏鴉欲共彈
Oo-a tsiânn-si̍t ū-kàu tshá,
Tshá kah a-má khì-tshuah-tshuah.
Gia̍h lâi tsiáu-phia̍k beh kā hánn,
Siòng tsún oo-a beh kā tuānn.
彼時烏鴨行倚伊的跤
阿媽毋但拍著驚
家己的跤煞踏著烏鴨的跤
踏甲烏鴨連紲叫六聲
樹頂的烏鴉嘛著驚 隨喝 啊 啊 啊
逐隻飛甲無看見影
Hit-sî, oo-ah kiânn uá i ê kha,
A-má m̄-nā phah-tio̍h-kiann,
Ka-tī ê kha suah ta̍h-tio̍h oo-ah ê kha,
Ta̍h kah oo-ah liân-suà kiò la̍k siann.
Tshiū-tíng ê oo-a mā tio̍h-kiann, suî huah ah ah ah.
Ta̍k-tsiah pue kah bô khuàinn iánn.
呱 呱 呱 呱 呱 呱
趕趕趕 趕趕趕
阿媽趕鴨去後壁埕
紲落 踏入灶跤 喝欲啉茶止喙焦
Kuā kuā kuā, kuā kuā kuā,
Kuánn kuánn kuánn, kuánn kuánn kuánn,
A-má kuánn ah khì āu-piah-tiânn,
Suà--lo̍h, ta̍h ji̍p tsàu-kha, huah beh lim tê tsí tshuì-ta.
阿媽茶啉煞 目睭一下看
哎喲喂啊
六隻烏鴨無人看
哪會閣走來頭前埕
才一觸久仔
慘矣 烏鴨共三欉芋仔食甲焦焦焦
A-má tê lim suah, ba̍k-tsiu tsi̍t-ē khuànn,
Ai--iō-uê--ah,
La̍k-tsiah oo-ah bô lâng khuànn,
Ná ē koh tsáu lâi thâu-tsîng-tiânn?
Tsiah tsi̍t-tak-kú-á,
Tshám--ah, oo-ah kā sann-tsâng ōo-á tsia̍h kah ta-ta-ta.
這聲
阿媽是欲按怎較好啊？
Tsit-siann,
A-má sī beh án-tsuánn khah hó--ah?
【華台英俗諺快譯通】
台：豬頭毋顧，顧鴨母卵。
Ti-thâu m̄ kòo, kòo ah-bó -nn̄g.
華：本末倒置。
英：Don’t put the cart before the horse.
【問題討論】
1. 你喙焦的時較愛啉啥物？為啥物？
2. 你較佮意蹛都市抑是庄跤？為啥物？
3. 你敢有心愛的物件予人舞歹去的經驗？請講出情形佮想法。
【應答短文】
我喙焦的時較愛啉滾水、茶米茶抑是果汁，其中我上愛啉滾水。
有人講滾水白汫無味，毋過我感覺上單純、上讚。水四界攏有，閣俗，揹仔內底若紮一支茶鈷，喙焦就通揣飲水機入水啉。閣因為我教冊佮興趣的工課定定愛用著嚨喉，拉圇仔燒的滾水，半燒冷仔半燒冷上拄好。因為有滾水潤喉，到今我的聲音閣保持甲袂䆀。
我嘛會啉茶米茶，伊無啥方便閣淡薄仔貴，上興毋過無逐工啉。我佮意彼款苦甘仔苦甘、順喉的滋味。啉著高山茶米，人隨飛去懸山1500 米，規个人會予大自然的美景箍入去。
我嘛誠愛啉果汁，因為我是果子國的。食飯飽，規盤的果子照常共推落去，才會感覺五臟六腑有平衡。有當時仔無閒規工，無食著果子閣會數念呢！所以我定定點果汁來啉。毋過聽健康專家講果汁攏糖較濟，嘛警告講我這款定定拍電腦、坐鬱過久的，愛撙節好勢。酸微仔酸微的果汁會礙胃溢剌酸，我驚無踏擋仔，會變成惱氣的火燒心，只好改改咧較規氣。
所以，遮改遐改，改甲賰滾水佮茶米茶啦！單純的滾水，啉久嘛甘甜。自然、方便上歡喜。啊若欲體會人生的苦甘仔甜，當然嘛是啉茶米。看心情佮環境啦！我兩項攏佮意。
