臺語演講三五步(增訂版)-指導大人演講比賽？祕笈

踏話頭

一本無啥市草的臺語冊，「初版一刷」出版社就殘殘印1,500 本，這馬兩年拄過，經過修正錯誤、增加內容，出版社就欲閣殘殘「再版一刷」，這當然是予人歡喜的代誌。

這本冊ê內容，是我二十外冬來，佇新北市(以早臺北縣)指導臺語演講大人組ê選手，所使用ê教材佮長年累積ê經驗，共抾做伙ê成果。佇2009年，我第一擺共我集訓選手ê資料編做一本講義，名稱就叫做《臺語演講有撇步》，這馬欲正式出版矣，因為冊名驚去佮人傷相仝，就謙卑共號做《臺語演講三五步》，表示伊干焦是三五步ê基本功夫爾。愛特別感謝ê是，佮我同齊訓練選手ê同工，因為予我誠濟啟發佮幫贊，若無，這本冊就無法度出版矣。

當然，這本冊ê內容，除了我家己長久以來累積ê經驗佮看法，嘛愛感謝真濟幕後英雄。是提供我智識ê專家學者佮各種網站ê資料，其中有歷史、生態學家ê著作，文學家ê作品，嘛有文化性網站ê豐富內容，以及政府網站ê正確資訊。遮ê著作佮網站，攏予我佇咧編寫這本冊、共資料改寫做臺文ê時，有真大ê貢獻。特別是佇演講ê「言辭證據」這方面ê資料蒐(soo)集，咱攏無法度避免愛去參考遮ê智識佮資訊。

想欲出版這兩本冊有三个動機：幫助參加臺語演講ê選手，共指導演講ê老師佮家長鬥相共，以及為推展臺語文盡一份力。三个動機攏誠單純，毋過目標真懸，是毋是有才調達成，攏愛試看覓才會知。

其中，第三點特別困難。因為佇推展臺語文ê過程中，咱會拄著：學生袂曉講、家長無重視、老師應付、母語ê語言環境愈來愈䆀，以及政客、教育官員對本土語言無理念，四常放屁安狗心，予咱聽甲咬牙閣切齒，強欲去舂壁！

我想，欲救臺灣話，上重要ê干焦三條路：

第一條，對幼稚園到高中攏愛有母語ê課程，逐禮拜三節課以上，並且欲升高中佮大學，攏愛認證一種本土語言，及格ê才有資格升學。這是政策問題，需要有智慧佮決心ê本土政權，做政治解決。

第二條，予母語有實用ê價值。愛立法規定，欲去原住民、客家人、抑是hō-ló人佔多數ê縣、市、鄉、鎮服務ê公務人員，包括老師、警察、稅務、鐵路局、地政人員、公所辦事員等等，攏愛通過當地本土語言中高級以上ê認證。無，就袂當錄取。

第三條，予母語生活化、教育化。無論是佇家庭、教室、抑是公共場合，攏愛慣勢講母語，老師上課嘛用母語教學(這就是「浸水式」ê教學)，按呢才有法度營造(îng-tsō)較好ê母語環境。若無，本土語言、咱ê族語，會漸漸無去ê運命，是一件無法度挽回ê代誌矣！

出版這本冊，毋敢有傷濟向望，講按呢就有夠額矣。

Lâu Bîng-sin  2021.08.23