【電子書】都柏林人（台文版）

譯序（節錄）

《都柏林人》：寫人，嘛是寫城市
劉盈成

《都柏林人》（1914）是詹斯．若依斯ê頭一部重要作品，提都柏林人ê市民做主角，寫做十五篇ê短篇小說。都柏林是愛呂蘭ê首都，大英帝國ê一座大城市，嘛是若依斯ê故鄉。十五篇敆做一个整體，表面是咧寫人，寫一寡中產階級市民，事實是藉市民來描寫城市，欲呈現這个城市（佮愛呂蘭）ê精神麻痺。自按呢，若依斯開示一條「城市解剖」ê路數，都柏林去予文學家頭一斗提伊「城市」ê身份來做題材。

這个路數，台灣ê文學讀者拍算有熟似。《都柏林人》佮台灣文學（無論是華文或者台文）ê牽連，咱直接會聯想去白先勇（Pe̍h Sian-ióng）ê《台北人》（1971）。頭一項，這本號冊名就佮1914年ê《都柏林人》仝一个手法。限定一个城市，用幾若篇ê短篇小說，描繪（biâu-huē）城裡五花十色ê人。若依斯十五篇，白先勇十四篇，兩爿攏是敆做一个整體，解剖城市ê心靈。寫人，嘛是寫城市。

都柏林這个城市毋但是誠實有，小說內底市民生活ê所在，包括街仔路、酒館、小店、建築物、冊店、地號名，猶閣有歷史人物ê遺事，攏是誠實--ê。Hām「英國殖民」佮「天主教」兩大勢力，嘛正經佇本城咧走跳。所致，小說虛構（hikòo）ê都柏林人，舉動言語攏有伊「寫實」ê環境。若依斯用這號筆路，忠實打造都柏林人無風無搖ê生活，佮無味無素ê故事情節。

這寡都柏林人，主要是無「存在感」ê市民，nobody（若是《台北人》，有頭面ê人物就較濟）。𪜶ê人生故事，無啥物精彩ê情節，毋是奇巧刺激、予人讚嘆（tsàn-thàn）彼路。啊若依斯這部現代性格ê城市文學，干干仔就利用平凡小市民ê故事，來刺（tshiah）這个城市ê根底。

《都柏林人》ê市民毋但有大人，嘛有囡仔、少年人，正經是「大人囡仔攏來看」。猶未成年--ê，有ê囡仔較巧，佮神父學智識，有ê人偷走學，有--ê數想初戀。大漢了後，有人正正當當上班食頭路，有人浮浪貢，有人按算欲交陪好額人，通做伙趁大錢。正經度日--ê，有人佇大學教冊或者私人教師，有人做辛勞，有人四界走傱賣貨，有人是厝稅予人蹛。宗教方面講著神父，有--ê中風，有--ê愛讀一寡世俗、刺激ê冒險小說，也有愛聽人偷來暗去ê情愛故事，也有人犯錯誤，袂當閣再主持彌撒、聽人告解。

有人踏入婚姻罔度日，有人欲佮情郎相𤆬走、煞臨時叫毋敢，也有人孤身一个無想欲嫁娶。無情ê人放捨情愛，有情人心懷欲望；欲望若無滿足，有人拍囡仔拄數，有人用文學詩歌來消磨人生，有人艱苦甲去予火車挵死。有人酒啉甲茫茫，有人醉甲跋落樓梯跤，有人𠯗一下就好。有做老母--ê欲栽培查某囝踏入較好ê社會，嘛有老母利用查某囝ê青春，做套欲揣一个囝婿。有人認同愛呂蘭ê文化佮獨立地位，有人接受殖民統治，凊彩會得過就好。

這都描寫浮世眾生啊，二十一世紀ê讀者凡勢看著誠慣勢矣。毋過越轉去百外冬前，天主教信仰、英國殖民攏是理所當然ê價值，這是都柏林ê「A面」。啊經過這十五篇故事，經過無風無搖ê生活描寫，市民ê心靈麻痺才來拆破。都柏林ê「B面」，自按呢就予若依斯共反（píng）出來。

（略）

用台語來翻譯世界文學經典，毋是干焦為著台語真親切、有鄉土味，予咱想起阿公阿媽，嘛毋是干焦欲宣傳台語有偌媠。台文譯本毋是綴佇華譯本後尾、罔加一種語言ê譯本，嘛毋是欲喝一句「《都柏林人》也會曉講台語喔」爾。正經講，世界各地文學、語言ê現代化，定著需要外國文學經典ê翻譯佮紹介。日本、華語ê文學，攏捌行過仝一條路，台語ê現代化嘛著愛。

欲翻譯外國ê文學經典，有人嫌台語無彼號資格。我想著囡仔時代，老母捌提海明威《戰地春夢》ê華譯本，改用台語講予我聽。彼當陣阮英文袂曉，毋過，無仝語言有通互相來理解、轉述，這阮自來毋捌懷疑。