作者的話

神奇漢藥房，記錄我細漢ê時佇厝內面聽著、看著ê，閣有鬥顧店ê記持。
定定有朋友共我問：「是按怎冊名欲號『神奇』這兩字？」

因為，我想欲表達足濟神奇ê概念：
神奇ê人，互相信任；
神奇ê藥材，產生應效；
神奇ê所在，共人箍做伙。

這間漢藥房ê頭家就是阮媽媽，伊有真濟故事通講，我真數念伊，嘛真思念彼間漢藥房。
這本冊欲獻予我ê媽媽—柯碧女士，閣有伊ê店—「壽春藥房」。