〈月光光〉

月光光，做醃缸

滷兜鹹菜來做湯

一碗飯，兩碗湯

食到撐肚尋眠床

月光光，作陂塘

捉條鯉嫲來煮湯

一碗酒，兩碗湯

食到醉醉睡崩崗

月光光，尋烏糖

斷截粢粑來搵糖

烳焢肉，做肥湯

食到飽飽睡天光

月光光，尋銅笐

拿兜祛把來做竹笐

破兩析，做輪框

叮叮噹噹變玲琅

〈開槽借石〉

開槽借石

大石一隻一隻疊

細石一隻一隻楔

石䃗連連，石頭矺

鑿空鬥榫

樹桱仔斯一枝一枝接

大樑正正

瓦仔斯一垤一垤疊

攀籬吊壁

就像猴仔樣

疲爬極蹶，舂上跌落

無法度抓

橫架直架

歸間屋，亂操操，狼離狼犁

想著，就頭那毛拿來扡

爪上爪下

仰結煞啊！仰結煞！