論自由

第一章：踏話頭

John Stuart Mill 約翰．史都華．彌爾╱著
倪振豪╱台文翻譯


這篇論文想欲討論的「自由意志」，毋是咱討論哲學，定定佮必然論徛對頭的彼个。咱遮的「自由意志」，是人民的自由、或者是社會的自由：就是佇合理的範圍內，社會對人民會當使用啥物款的權力以及社會權力的制限。這个問題罕得有人公開討論，毋過這个無聲無影的問題，煞對咱這个時代的社會爭議造成深遠的影響，而且過無偌久就會成做未來上要緊的議題之一。這个問題毋但年久月深，而且自遠古時代開始，咱人就為著這个問題徛無仝爿。咱社會進步到這馬這个坎站，這个問題嘛綴咧新的社會狀況閣來出現。所擺，咱著愛換一个步數，對根底來討論才會用得。


咱細漢時攏捌學過歷史，相信逐家應該攏對「自由佮威權的衝突」這段印象上深，尤其是希臘、羅馬、英格蘭這三个國家歷史上的衝突。往過，「自由佮威權的衝突」干焦會發生佇政府佮全體人民（或者是部分階級的人民）之間。彼陣，「自由」的意思是「免受統治者凌治」。除了古早時代的一寡希臘政府會為著人民設想以外，逐家一般攏認為「統治者，生成就和人民做對頭」。

往過的政府，攏是孤一个統治者（若無就是一陣統治者抑是社會階層）咧控制。遮的統治者，𪜶的權力毋是來自人民，是透過繼承、征服得著的，就算有制度要求統治者袂當使用權力對付人民，人民嘛無膽（甚至有可能無想欲）去挑戰統治者的權力。雖然逐家認為統治者有必要共權力搦佇咧手頭，毋過嘛認為這種權力太危險，袂輸若一个武器，毋但會使提來對付外來的敵人，嘛會使對付家己的人民。若想欲保護社會的弱勢莫去受遮的惡霸蹧躂，著愛一个較大尾伊的鱸鰻，才有法度共遐的惡霸攏總壓落底。毋過這尾鱸鰻原仔會去蹧躂社會弱勢，人民著愛時時共看絚絚，伊才無機會舞東舞西。