我有一个夢 Guá ū tsi̍t-ê bāng
馬丁．路德．金恩 Martin Luther King Jr.／著，倪振豪／譯

一百冬前，有一个偉大的美國人佇《解放奴隸宣言》簽字，咱到今猶繼續咧享受伊身影的致蔭。千千萬萬的烏奴受盡不公不義的折磨，對𪜶來講，這條重大的法令袂輸是希望的燈塔、嘛親像是拆箬時的光明，照光𪜶原本苦海無尾的奴隸人生。

毋過一百冬過去矣，烏人猶原是無得著自由。一百冬了後的這馬，種族隔離的跤枷佮歧視的鎖鍊，猶原是共烏人縛甲袂振袂動；一百冬了後的這馬，雖罔咱國家的資源已經飽滇，袂輸深無底的大海，毋過烏人煞是牢踮不止仔散赤的孤島頂懸；一百冬了後的這馬，美國社會的邊仔角，烏人猶原是欲死盪幌，繼續佇共阮育飼大漢的土地頂懸四界流浪。阮今仔日來遮，就是欲愛逐家共這件代誌看現現。

阮今仔日會來到咱國家的首都，逐家嘛會使共阮看做是來壘票的，因為當初時，咱共和國的先人共咱的憲法佮獨立宣言寫出來，𪜶其實就是咧開支票，而且是一張欲傳予所有美國人的支票。彼張支票寫講，不管咱是白人抑是烏人，咱所有人的性命、自由、佮追求幸福的權利攏會受著保障。

毋過若是看著咱現此時的有色國民，就會知影彼張支票是一張菝仔票。美國無遵守這个神聖的約束，顛倒來開一張菝仔票，去予銀行踮頂頭寫「存款無夠」。毋過阮毋願相信正義的銀行已經破產；咱國家的寶庫內底，阮相信一定閣有濟濟的機會，嘛是因為按呢，阮才會一逝路走來遮，想欲用阮的手形來交換自由佮正義。

阮來到這个神聖的所在，是想欲愛咱全美國知影現此時這个坎站有偌爾仔重要。現此時，咱處理遮的不公不義，袂當閣繼續拖拖沙沙；現此時，是民主的約束應該愛實現的時陣；現此時，咱著愛對種族隔離這號烏暗閣拋荒的山谷行出來，向正義的光明大道踏出咱的跤步才著；現此時，咱著愛共咱的國家對種族不義的沙河內底搝出來，按呢咱的國家才有法度徛踮人人公平的磐石頂懸；現此時，對上帝所有的囝孫仔來講，是正義愛實現的時陣。