●城隍夜巡諸羅城 sîng hông iā sûn tsu lô siânn

臺灣第一城，諸羅舊地名，
tâi uân tē it siânn，tsu lô kū tē miâ，

到今三百冬，三大古廟頭一名，
kàu tann sann pah tang，sann tuā kóo biō thâu tsi̍t miâ，

國定古蹟就佇遮。
kok tīng kóo tsik tō tī tsia。

夜審陰、日判陽，賞罰分明城隍爺，
iā sím im、ji̍t phuànn iông，siúnn hua̍t hun bîng sîng hông iâ，

陰陽介管，伊是地方的司法官，
im iông kài kuán，i sī tē hng ê su huat kuann，

趕孤魂、驅陰邪，護善除惡真猛掠。
kuánn koo hûn、khu im siâ，hōo siān tî ok tsin mé lia̍h。

八月初一時間定，相招做陣去廟埕。
peh gue̍h tshe it sî kan tiānn，sio tsio tsò tīn khì biō tiânn。

城隍夜巡金風起，威靈護佑番薯仔囝。
sîng hông iā sûn kim hong khí，ui lîng hōo iū han tsî á kiánn。

大二爺、什家將、文武判、
tuā jī iâ、si̍p ka tsiòng、bûn bú phuànn、

四大神秋冬春夏、四將軍甘柳范謝，
sì tuā sîn tshiu tang tshun hā、sì tsiong kun kam liú huān tsiā、

陣頭聲勢大，閣有𤆬路小鬼、刑具爺，
tīn thâu siann sè tuā，koh ū tshuā lōo sió kuí、hîng kū iâ，

捕快攑刀兩爿徛，犯人押束關囚車，
pōo khuài gia̍h to ln̄g pîng khiā，huān lâng ap sok kuinn siû tshia，

也有夯枷綴咧行，鬥鬧熱毋管大人抑囡仔。
iā ū giâ kê tuè leh kiânn，tàu lāu jia̍t m̄ kuán tuā lâng ia̍h gín á。