拍拚類

烏鴉啉水

A卷 30秒看圖講話參考答案
１、佇一塊大石頭附近，有一支矸仔，矸仔內底有一寡水。
２、有一隻烏鴉真喙焦，看著這支矸仔，毋過因為矸仔傷長，伊啉袂著水。
３、烏鴉咬一塊細塊的石頭仔，共擲入去矸仔內，水就沓沓仔漲懸起來。伊就飛幾若逝，一直去提石頭仔。
４、尾仔，矸仔內底的水漲到矸仔喙，這隻烏鴉就會當啉著水矣！

B卷 1分鐘看圖講話參考答案
１、佇一塊大石頭附近，有一支矸仔，矸仔內底有一寡水。
２、有一隻烏鴉，真喙焦，飛來飛去揣無水通啉，看著這支矸仔，就飛去矸仔頂懸想欲啉水。毋過因為矸仔傷長，伊的喙傷短，就啉袂著水。就開始想講愛按怎做才會當啉著水？
３、烏鴉那想那飛走，無偌久，伊就轉來矣！伊的喙咬一塊細塊石頭仔。伊共石頭仔擲入去矸仔內，水就沓沓仔漲懸起來。就按呢伊飛幾若逝，一直共石頭仔擲入去矸仔內。
４、尾仔，矸仔內底的水總算漲到矸仔喙，這隻烏鴉嘛會當啉著水矣，伊感覺真歡喜！

情境演說 2分鐘參考答案
　　森林內底有一條路，定定有人來拍獵，嘛有人會落一寡物件佇遐。佇一塊大石頭附近，有一支矸仔，矸仔內底有一寡水，遮是一个獵人落落來的。
　　有一隻烏鴉真喙焦，飛來飛去煞揣無水通啉，看著這支矸仔，真歡喜，就飛去矸仔頂懸想欲啉水。毋過因為矸仔傷長，伊的喙傷短，就啉袂著水。所以伊就開始想愛按怎才會當啉著水？
　　烏鴉那想那飛走，無偌久，伊的喙就咬一塊細塊石頭仔轉來矣！伊咬石頭仔擲矸仔，想欲共摃予破，結果啥物代誌攏無發生。伊繼續咬繼續擲，希望會當成功，結果無細膩煞共石頭仔擲入去矸仔內，伊發現水竟然沓沓仔漲懸起來。伊就飛幾若逝，一直咬石頭仔擲入去矸仔內底。
　　尾仔，矸仔內底的水總算漲到矸仔喙，這隻烏鴉嘛會當啉著水矣，伊感覺真歡喜！因為伊毋若止喙焦，閣完成一件本底伊認為無可能會當達成的代誌。

情境演說 Q＆A參考
Q：你認為烏鴉是按怎會去提石頭仔來？
A：因為伊想欲啉水，就想足濟辦法攏去試看覓。
Q：這个故事予你啥物啟示？
A：做代誌若拄著困難，應該攏愛試看覓各種有可能解決的辦法，無定就會揣出解決困難的好撇步。