台灣民間故事——燈猴的傳說

逐家攏佮意過年，佇咱台灣，有一个屬於咱家己的新年故事喔。足久足久以前，台灣人無論啥物鬼神攏會祭祀，逐年到秋冬季節，會相連紲舉辦謝神的「謝冬尾」祭典。毋過，無閒佇咧祭祀的台灣人，煞一直袂記得「燈猴」。神桌面頂的蠟燭台，就是燈猴一直替神明攑咧，真辛苦，咱煞毋捌專工來共酬謝……

　　「我逐工遐爾辛苦，徛佇眾神邊仔攑蠟燭，照護家家戶戶，結果恁遮的人干焦知影奉祀神明，攏無人想著我！哼……」
　　彼時的臺灣人欲到冬節的時陣，攏會共圓仔黏佇家具、窗仔台頂，慰勞遮的物件的貢獻。毋過掌燭台的燈猴，久來身軀頂滿是燭淚，所以圓仔黏袂起去，祭祀的時陣閣予人放袂記，燈猴非常不滿……。
　　「好哇……恁按呢看我無點，閣共圓仔四界黏，根本是無禮兼無衛生……我欲去天庭去共玉皇大帝報告，講恁對會食得的物件真討債，閣毋知通感恩！」
　　就按呢，燈猴來到天庭面見玉皇大帝。
　　「報告玉皇大帝，我發現台灣人有一个習慣足害的，就是𪜶對會食得的物件攏袂曉珍惜，足拍損的，尤其是彼个圓仔！𪜶無提來食，顛倒是提來黏佇窗仔台，叫是按呢有趣味，完全毋知通感恩，真正是亂七八糟！
　　玉帝講：「喔？有這種代誌？」
　　「著啊！這圓仔製作的過程誠～無簡單呢！頭先愛共秫米粉佮水攢予好勢。囥踮碗公撋做粿粞。閣來著愛分做一大塊一細塊，細塊的量大約六分之一。先共細塊粿粞用滾水煠，煠甲予伊浮起來。這種煮過的粿粞號做『粿娘』， 才閣共加轉去原來的粿粞，斟酌齊勻撋做伙……」
　　「啊，好好好，到遮就好到遮就好。製作過程真無簡單，這我有了解矣。」
　　「所以講遮的人就是討債！」
　　「按呢你感覺愛按怎處置？」玉帝問燈猴。
　　燈猴講：「我感覺乎……應該愛略仔共𪜶治罪……毋著！略仔治罪無夠，愛重重來共治罪！」
　　「Hmh……好！既然𪜶遮爾仔毋知通感恩，我決定欲降大水，共台灣沉落去大海裡。」
眾神明聽著玉帝按呢下旨，攏趕緊替凡人求情：「萬萬不可！」「請玉帝三思！」「這傷嚴重矣，莫衝碰啊！」
　　毋過玉帝真受氣。
　　「吾意已決！正月初一就將台灣沉入大海！」
　　眾神紛紛出來苦勸，毋過玉帝心意已決，按怎講都無路用。

(未完)