槍聲
1
冷鋒面過境的春寒時天，早起拄落過雨，雖然雨已經停，不過氣溫猶誠低。壽山跤的看守所是一棟抹紅毛土的氆色建築物，四周圍箍一輾懸懸安鐵枝仔的圍牆。圍牆內底這面停一台軍用的吉普仔車，有一个查甫人徛佇車門邊。伊穿西米羅，手骨綁一塊有赤十字記號的布條，生狂著急的眼神投向看守所的大門。無外久，彼道門嘎一聲拍開，一个青年褪赤跤位內面行出來。穿西米羅的查甫人斟酌看，雄雄頓蹬一下。青年真虛弱，衫褲破糊糊，袂輸乞食模樣，行路小可跛跛，跤底親像拖萬斤的重量。不過，彼確實就是伊咧等的人。
「正雄君，真正是你，正雄君！」穿西米羅的查甫人大聲喝。
青年譴頭。
「院長！院長！想袂到，啊！」
這兩个人真激動，怹一下攬做伙，目屎流規面。
這是一九四七年三月初九的代誌，彼日位看守所行出來的青年，名叫許正雄，二十五歲，日本久米留大學醫科博士，戰後轉來台灣，擔任高雄市立病院的齒科主任；另外彼个，就是市立病院的院長蘇山景。
當然，若看眼前的模樣，無人認會出許正雄是一位醫師。
「我三日前就應該愛死……就應該愛死矣啦……」
其實拄才，兵仔開門喝名的時，許正雄已經覺悟。因為彼幾日以來，有幾落擺，伊佇過度枵餓的半昏迷之中看著兵仔入來將人喊出去，過無偌久，就有槍聲位山壁的方向傳過來；逐擺佇這个時陣，牢房內就是一片寂靜。每一个人攏將目睭瞌起來，是紀念，嘛是佇心肝頭將死者的背景閣唸一遍。「咱互相鬥相共，誰若會使活咧出去，就負責去向咱厝裡的人通報。」這是怹的約束。伊佮二十幾个人關佇一間小小的牢房，因為牢房傷擠，人疊人，伊傷久無振動，規身軀麻痛。正雄聽著兵仔喝伊的名的時，強強peh 袂起來。「許桑！」坐佇伊邊仔的李阿順斡頭講：「請你會記，佇苓仔寮，我的阿娘……」李阿順的目墘澹澹。正雄向伊頕頭：「會，我會去，假使……」伊無閣講。小小窗仔縫滲入來的窗光，親像是伊生命最後的一束光線，宣布伊的死期到位……
伊喙唇咬咧，恬恬綴佇兵仔後面行，去到玄關一塊柴桌仔頭前。一个外省軍官叫伊簽名。外省軍官講：「簽完名，你就可以滾了。」伊起先毋敢相信，想講是家己聽無啥有北京話，聽毋著去，所以tshāi直直毋敢振動。「叫你滾，你沒聽見嗎？」邊仔的兵仔夯跤共踢，手指門口的方向，叫伊走。按呢，伊才真正清醒過來。
──完全想袂到，伊，竟然是夆放出來的人。
「正雄君，你敢知影？許參議員伊……」蘇院長講。
「是，我知……」
一時間重生的歡喜之情，即刻位許正雄的面消退。伊頭佒低，目屎輾落來。
──「正雄郎！」佇彼陣槍聲之後，多桑是按呢共喊的。紲落……
正雄干焦想欲緊離開這个所在。
蘇院長講，有重要的病人下晡會到，愛緊轉去。「我先送你轉去厝換衫，來，咱就去病院。」
蘇院長請正雄坐入車底。正雄的面一時躊躇。毋知啥物時陣，一个兵仔已經坐入去佇軍車的駕駛座，將車發動。
「放心啦！」蘇院長講。
怹鑽入車後斗。
軍車駛出看守所圍牆的鐵門的時，正雄斡頭看，拄落雨了的薄霧罩佇壽山山坪的相思林。山頂的烏雲必一巡，有微微光線射落來。
正雄鼻著家己一身軀焦去的血佮屎尿濫濫做伙的味，一陣反腹。
「我想，你知影是誰。」蘇院長講。
正雄頕頭。
無外久，車駛入鹽埕埔。經過市政府門口的時，伊的面貼佇窗仔邊。市政府頭前的廣場，這馬是一列一列的棺柴，排列佇四个角落的衛兵的槍空下。正雄位嚨喉底輕輕仔喝一聲：多桑……
2
蘇院長佮正雄轉到病院的時，已經是下晡一點。怹一落車，彼台吉普仔就踅頭離開。
市立病院佇小圓環北爿三百外米遠的路邊，是日本人佇戰爭尾聲起的。當初時，院裡的現代設備攏直接位日本配送過來。病院是一棟隘腹深間，二層樓懸的白色紅毛土建築物，大門向西，有遮日夯雨的白色門廊伸向硿紅毛土的頭前埕。彼時埕前的路猶是石頭仔路，路的對面佮遠遠的高雄川閣有鐵枝路之間，是一片稻田。三月，稻仔拄播好，青色的稻仔栽，佇田中央排列甲整齊整齊。水田映出壽山的山影，有幾隻白鴒鷥歇佇田墘。
病院的門口埕較早攏停四五台三輾車等欲載人，不過，彼日只賰七八个外省兵，圍佇角落的鳳凰樹跤，搦十八搏徼。怹phih-pheh叫，喝甲大細聲。
「啊！」正雄聽著怹的喝聲，心肝頭雄雄搐一下，親像猶有驚嚇。
「正雄，閣有佗位無爽快？」
「呃……無，無要緊。」
許正雄一个人坐佇二樓診療室的辦公桌，思考這幾工到底發生啥物代誌。佇一場熱情之後，這个城市雄雄冷靜落來，敢若之中存在一个巨大的斷層，予伊經過這三工監牢的烏暗了後，遂完全袂認得。敢毋是仝款？親像這塊桌仔、這條椅仔、抑是伊桌頂的紙筆佮墨水。一本烏皮燙金字的齒科辭典囥佇桌頂，彼日伊離開進前，拄好掀開佇某一頁；彼頁插圖有一齒喙齒，深深釘入齒岸，插圖畫出神經佮血管的分佈。正雄將冊閡起來。字典邊仔囥一枝鋼筆，是伊去日本留學進前，多桑位堀江買來送伊的，烏色的筆身用日本話刻一逝金字「正雄郎金榜留念」，字已經褪色。這枝鋼筆一直紮佇伊的身軀邊。
──「烏尼桑，咱敢欲轉去？」正雄想起戰爭拄結束的時，佮伊作夥佇日本的小弟世雄按呢問伊。「哪會使無轉去，多桑佮卡將攏佇台灣，哪會使無轉去。而且，啊！這是祖國的勝利啊！」正雄想起怹佮幾个台灣學生，提紙、提筆、提尺，佇無人看見的房間偷偷仔學畫青天白日旗的光景。
正雄行到窗邊，病院向南這爿，有幾間日本式的烏瓦厝，閣較遠的所在，半烏陰的市街路，寂靜中有肅殺之氣。伊聽會著外省兵的皮鞋聲，khiak-khiak 叫，有時猶有一聲兩聲槍聲，遠遠位某一个方向傳過來。除了夯槍的兵仔，路裡無啥物人，更加看無一个少年家，怹敢若是綴前幾日的雨水做伙消失去。
「主任，這是彭老夫人的病歷。」護士小姐佇伊背後講。
「嗯！先囥咧！」
「院長講，伊隨時會到。」
「嗯！我知。」
正雄行轉來坐落佇椅仔。
──「正雄郎！」
多桑的面容又閣出現。排山倒海的血跡佮悲傷位伊眼前嵌落來。
3
可能是因為傷過頭忝，無外久，正雄的目睭隨就瞌去。
茫茫中，伊親像聽著有人喝伊的名。醒過來的時，彭老夫人佮伊的新婦已經入來佇診療室。怹佮平常時仝款，攏穿旗袍。
「啊，真失禮。」正雄目睭擂擂咧，用生疏的北京語講。
「哪的話，沒干係。」彭老夫人講：「虧你回來了，要不然，我這牙，今晚上可有得受了。」
正雄請伊坐上診療椅。彭老夫人將一个珍珠皮包仔交予新婦，坐起去。邊仔的護士過將椅仔放予䖙落來。
「還是，那一顆嗎？」
「大概吧。這牙啊，痛起來可玄，一整張嘴痛得，要說哪一顆也說不準。」
正雄看護士。護士用台語共這句話閣講一擺。彼个護士是大港埔在地人，戰後捌參加過黨部婦女會辦的國語講習班，聽較有。
「喔！」正雄講：「這個，很平常。」伊將椅仔頂面的診視燈拍灼。
正雄看著伊頂排第一齒後齻蛀甲愈深落去，齒岸紅閣腫。伊提出一支鐵鋏佇下排對應的後齻頂面輕輕敲兩下。
「唔！痛！就是這兒。」彭老夫人講。
「很痛嗎？」正雄閣敲二下。
「很痛。」
「其實，我敲的這一顆好好的。這是說，您上排的那一顆蛀得很嚴重，所以才牽動底下的大神經。」
「哇！啥麼神經？那可怎麼辦？要拔掉嗎？」坐佇邊仔的彭司令夫人真緊張按呢問。
正雄閣詳細檢查一下，講：「嗯！不過，要先麻醉。」
伊拜託護士準備麻射，請彭老夫人先漉喙。
「不會痛吧？」彭司令夫人問。
正雄斡頭看彭夫人。
彭夫人的目睭閃開：「我是問你，痛是不痛？」
正雄無講話，親像咧想啥。
護士共手裡的麻射交予正雄，正雄將射針提到目睭的懸度，輕輕仔捒一下射筒。彼射針閣幼閣長，藥滴滲出一滴兩滴。紲落，伊將面向佇彭老夫人開開的喙頂懸。
無外久，正雄閣來到窗邊，伊請彭老夫人小歇睏，等麻射降。伊看著烏雲當咧貼低，敢若閣欲落雨；拄才載伊轉來的彼台吉普仔，這馬停佇病院的門口埕。
「許醫師，令尊的事……我們……我們聽說了，我們很遺憾。可是，無論如何你要記得，你的命可是老夫人救的，這可是救命之恩啊！」彭司令夫人雄雄按呢講。正雄斡過來看怹。伊對怹深深一曲躬。
1
冷鋒面過境的春寒時天，早起拄落過雨，雖然雨已經停，不過氣溫猶誠低。壽山跤的看守所是一棟抹紅毛土的氆色建築物，四周圍箍一輾懸懸安鐵枝仔的圍牆。圍牆內底這面停一台軍用的吉普仔車，有一个查甫人徛佇車門邊。伊穿西米羅，手骨綁一塊有赤十字記號的布條，生狂著急的眼神投向看守所的大門。無外久，彼道門嘎一聲拍開，一个青年褪赤跤位內面行出來。穿西米羅的查甫人斟酌看，雄雄頓蹬一下。青年真虛弱，衫褲破糊糊，袂輸乞食模樣，行路小可跛跛，跤底親像拖萬斤的重量。不過，彼確實就是伊咧等的人。
「正雄君，真正是你，正雄君！」穿西米羅的查甫人大聲喝。
青年譴頭。
「院長！院長！想袂到，啊！」
這兩个人真激動，怹一下攬做伙，目屎流規面。
這是一九四七年三月初九的代誌，彼日位看守所行出來的青年，名叫許正雄，二十五歲，日本久米留大學醫科博士，戰後轉來台灣，擔任高雄市立病院的齒科主任；另外彼个，就是市立病院的院長蘇山景。
當然，若看眼前的模樣，無人認會出許正雄是一位醫師。
「我三日前就應該愛死……就應該愛死矣啦……」
其實拄才，兵仔開門喝名的時，許正雄已經覺悟。因為彼幾日以來，有幾落擺，伊佇過度枵餓的半昏迷之中看著兵仔入來將人喊出去，過無偌久，就有槍聲位山壁的方向傳過來；逐擺佇這个時陣，牢房內就是一片寂靜。每一个人攏將目睭瞌起來，是紀念，嘛是佇心肝頭將死者的背景閣唸一遍。「咱互相鬥相共，誰若會使活咧出去，就負責去向咱厝裡的人通報。」這是怹的約束。伊佮二十幾个人關佇一間小小的牢房，因為牢房傷擠，人疊人，伊傷久無振動，規身軀麻痛。正雄聽著兵仔喝伊的名的時，強強peh 袂起來。「許桑！」坐佇伊邊仔的李阿順斡頭講：「請你會記，佇苓仔寮，我的阿娘……」李阿順的目墘澹澹。正雄向伊頕頭：「會，我會去，假使……」伊無閣講。小小窗仔縫滲入來的窗光，親像是伊生命最後的一束光線，宣布伊的死期到位……
伊喙唇咬咧，恬恬綴佇兵仔後面行，去到玄關一塊柴桌仔頭前。一个外省軍官叫伊簽名。外省軍官講：「簽完名，你就可以滾了。」伊起先毋敢相信，想講是家己聽無啥有北京話，聽毋著去，所以tshāi直直毋敢振動。「叫你滾，你沒聽見嗎？」邊仔的兵仔夯跤共踢，手指門口的方向，叫伊走。按呢，伊才真正清醒過來。
──完全想袂到，伊，竟然是夆放出來的人。
「正雄君，你敢知影？許參議員伊……」蘇院長講。
「是，我知……」
一時間重生的歡喜之情，即刻位許正雄的面消退。伊頭佒低，目屎輾落來。
──「正雄郎！」佇彼陣槍聲之後，多桑是按呢共喊的。紲落……
正雄干焦想欲緊離開這个所在。
蘇院長講，有重要的病人下晡會到，愛緊轉去。「我先送你轉去厝換衫，來，咱就去病院。」
蘇院長請正雄坐入車底。正雄的面一時躊躇。毋知啥物時陣，一个兵仔已經坐入去佇軍車的駕駛座，將車發動。
「放心啦！」蘇院長講。
怹鑽入車後斗。
軍車駛出看守所圍牆的鐵門的時，正雄斡頭看，拄落雨了的薄霧罩佇壽山山坪的相思林。山頂的烏雲必一巡，有微微光線射落來。
正雄鼻著家己一身軀焦去的血佮屎尿濫濫做伙的味，一陣反腹。
「我想，你知影是誰。」蘇院長講。
正雄頕頭。
無外久，車駛入鹽埕埔。經過市政府門口的時，伊的面貼佇窗仔邊。市政府頭前的廣場，這馬是一列一列的棺柴，排列佇四个角落的衛兵的槍空下。正雄位嚨喉底輕輕仔喝一聲：多桑……
2
蘇院長佮正雄轉到病院的時，已經是下晡一點。怹一落車，彼台吉普仔就踅頭離開。
市立病院佇小圓環北爿三百外米遠的路邊，是日本人佇戰爭尾聲起的。當初時，院裡的現代設備攏直接位日本配送過來。病院是一棟隘腹深間，二層樓懸的白色紅毛土建築物，大門向西，有遮日夯雨的白色門廊伸向硿紅毛土的頭前埕。彼時埕前的路猶是石頭仔路，路的對面佮遠遠的高雄川閣有鐵枝路之間，是一片稻田。三月，稻仔拄播好，青色的稻仔栽，佇田中央排列甲整齊整齊。水田映出壽山的山影，有幾隻白鴒鷥歇佇田墘。
病院的門口埕較早攏停四五台三輾車等欲載人，不過，彼日只賰七八个外省兵，圍佇角落的鳳凰樹跤，搦十八搏徼。怹phih-pheh叫，喝甲大細聲。
「啊！」正雄聽著怹的喝聲，心肝頭雄雄搐一下，親像猶有驚嚇。
「正雄，閣有佗位無爽快？」
「呃……無，無要緊。」
許正雄一个人坐佇二樓診療室的辦公桌，思考這幾工到底發生啥物代誌。佇一場熱情之後，這个城市雄雄冷靜落來，敢若之中存在一个巨大的斷層，予伊經過這三工監牢的烏暗了後，遂完全袂認得。敢毋是仝款？親像這塊桌仔、這條椅仔、抑是伊桌頂的紙筆佮墨水。一本烏皮燙金字的齒科辭典囥佇桌頂，彼日伊離開進前，拄好掀開佇某一頁；彼頁插圖有一齒喙齒，深深釘入齒岸，插圖畫出神經佮血管的分佈。正雄將冊閡起來。字典邊仔囥一枝鋼筆，是伊去日本留學進前，多桑位堀江買來送伊的，烏色的筆身用日本話刻一逝金字「正雄郎金榜留念」，字已經褪色。這枝鋼筆一直紮佇伊的身軀邊。
──「烏尼桑，咱敢欲轉去？」正雄想起戰爭拄結束的時，佮伊作夥佇日本的小弟世雄按呢問伊。「哪會使無轉去，多桑佮卡將攏佇台灣，哪會使無轉去。而且，啊！這是祖國的勝利啊！」正雄想起怹佮幾个台灣學生，提紙、提筆、提尺，佇無人看見的房間偷偷仔學畫青天白日旗的光景。
正雄行到窗邊，病院向南這爿，有幾間日本式的烏瓦厝，閣較遠的所在，半烏陰的市街路，寂靜中有肅殺之氣。伊聽會著外省兵的皮鞋聲，khiak-khiak 叫，有時猶有一聲兩聲槍聲，遠遠位某一个方向傳過來。除了夯槍的兵仔，路裡無啥物人，更加看無一个少年家，怹敢若是綴前幾日的雨水做伙消失去。
「主任，這是彭老夫人的病歷。」護士小姐佇伊背後講。
「嗯！先囥咧！」
「院長講，伊隨時會到。」
「嗯！我知。」
正雄行轉來坐落佇椅仔。
──「正雄郎！」
多桑的面容又閣出現。排山倒海的血跡佮悲傷位伊眼前嵌落來。
3
可能是因為傷過頭忝，無外久，正雄的目睭隨就瞌去。
茫茫中，伊親像聽著有人喝伊的名。醒過來的時，彭老夫人佮伊的新婦已經入來佇診療室。怹佮平常時仝款，攏穿旗袍。
「啊，真失禮。」正雄目睭擂擂咧，用生疏的北京語講。
「哪的話，沒干係。」彭老夫人講：「虧你回來了，要不然，我這牙，今晚上可有得受了。」
正雄請伊坐上診療椅。彭老夫人將一个珍珠皮包仔交予新婦，坐起去。邊仔的護士過將椅仔放予䖙落來。
「還是，那一顆嗎？」
「大概吧。這牙啊，痛起來可玄，一整張嘴痛得，要說哪一顆也說不準。」
正雄看護士。護士用台語共這句話閣講一擺。彼个護士是大港埔在地人，戰後捌參加過黨部婦女會辦的國語講習班，聽較有。
「喔！」正雄講：「這個，很平常。」伊將椅仔頂面的診視燈拍灼。
正雄看著伊頂排第一齒後齻蛀甲愈深落去，齒岸紅閣腫。伊提出一支鐵鋏佇下排對應的後齻頂面輕輕敲兩下。
「唔！痛！就是這兒。」彭老夫人講。
「很痛嗎？」正雄閣敲二下。
「很痛。」
「其實，我敲的這一顆好好的。這是說，您上排的那一顆蛀得很嚴重，所以才牽動底下的大神經。」
「哇！啥麼神經？那可怎麼辦？要拔掉嗎？」坐佇邊仔的彭司令夫人真緊張按呢問。
正雄閣詳細檢查一下，講：「嗯！不過，要先麻醉。」
伊拜託護士準備麻射，請彭老夫人先漉喙。
「不會痛吧？」彭司令夫人問。
正雄斡頭看彭夫人。
彭夫人的目睭閃開：「我是問你，痛是不痛？」
正雄無講話，親像咧想啥。
護士共手裡的麻射交予正雄，正雄將射針提到目睭的懸度，輕輕仔捒一下射筒。彼射針閣幼閣長，藥滴滲出一滴兩滴。紲落，伊將面向佇彭老夫人開開的喙頂懸。
無外久，正雄閣來到窗邊，伊請彭老夫人小歇睏，等麻射降。伊看著烏雲當咧貼低，敢若閣欲落雨；拄才載伊轉來的彼台吉普仔，這馬停佇病院的門口埕。
「許醫師，令尊的事……我們……我們聽說了，我們很遺憾。可是，無論如何你要記得，你的命可是老夫人救的，這可是救命之恩啊！」彭司令夫人雄雄按呢講。正雄斡過來看怹。伊對怹深深一曲躬。
