〈留菜仁  點蘿蔔〉

係佢時節囉

在　冬下時頭　　冬禾割起來後

堵好分　土地休息个季節

順續欸　種兜仔　大菜　蘿蔔　包粟   1  2

赴舊曆過年　　　好收成　　慶豐登

農作係基底个庄頭　叔姆伯姆儕

總會知得　　麼个時節　愛種麼个菜

用點　用委　愛隔幾遠欸　愛刪無   3  4  5

全憑耕作經驗　年復一年　自後生到老

該係　農耕儕个日常　　　乜係專長

留糧好過冬　過冬愛存糧

留糧防天荒　留才望興旺

吂落雨先帶遮　以防萬一

吂過身先買棺　圖个升官發財

留糧　　留糧　留良　　留良

1      大菜，意：芥菜

2      包粟，音：bauˊ xiugˋ，意：玉蜀黍，玉米

3      點，音：diam，意：將種子播種於土中，使其生長

4      委，音：ve，意：將種子均勻灑入土中，使其生長

5      刪，音：xienˊ，意：將種植太密集的部分，間隔刪減拔除掉

〈第參佰陸拾壹行〉

　　業有士農工商、人分烏白紅黃，業不分貴賤、人無分聰戇。麼个人做麼个頭路，排列組合起來百花千樣，特別講，現實个社會當中，斬頭个生理有人做，了錢个頭路無人會做，行行向錢看項項向前行。除忒工商登記个參佰陸拾行外，不止還有千工百業，多像過江之鯽，異難搣得清楚。

　　進前，對比較較冷門、較特殊个行業，會分佢兜安一個名號，像閹雞仔个歕嗶嗶仔 、算命个打牛角戴墨鏡、牽豬哥个著水靴拿水灑仔 、行醫儕訪診擐醫事包……這兜，都還有佢兜儕个職業代表性。

　　到現下來，有較濛線哩。除忒職場項个制服代表、色目代表 ，自由業个人士也就不一定有著制服。一般个菜擔仔、雜貨店、小商號、搐大麵个店頭家 ，隨意著無就儘採配，大體頭都安到做事衫、工作服，方便就好，自然無考慮到企業文化摎品牌个經營。

　　城鄉必定有差別，莫怪都會消費物價高、服務水準有較好，各行各業都有佢个行規、文化，連東方西方个購買行為、消費態度都無共樣。故所，鄉下人在鄉莊生活慣欸，請去台北倈仔屋下住三兩日仔，連買一杯涼水、食一餐飯、買一盒飯兜仔，都試著異虐削 。因爭，飯店食飯用平板電腦點菜、付錢結帳用信用卡簽帳卡，長一輩个高齡儕，仰得會習慣。

　　就怕係近近欸兩拾年內，有一個壞黨仔集團，專門賺人軟錢、挶頭腦落人錢銀 ，借等電話，無就手機仔、網路這兜聯絡工具，騙人錢財為職業。本薄利高風險大个不正當頭路，嘛有多人在該做，就係華語講个「詐騙集團﹂，想怕大家都識在電視新聞肚聽過正著。

　　又聽講，專尋退休个軍公教人士下牙 。這兜人相對單純、思考直線直線、又有固定个退休金，較好㓾較好釣 。毋使多，十件成有一件，一件五、六十萬新台幣，贏過別人一年个薪水。你看啊哩，有幾烏心肝！

　　該種頭路毋係正當頭路，害人害己害子孫，還係有人做。現實个社會，貪便宜貪自然、經濟社會風險高、投資管路少、貧清貧赤貧，麼个就毋驚，就驚無錢會分人看毋起，這款个社會觀，敢對？

　　日常，生活个日常，除忒做毋得去害人，還愛提防等詐騙集團。利用亂銃打鳥，打入你屋下个電話、手機仔來，因爭，多元複雜个社會型式，真正毋單止淨有參佰陸拾行，勸君不可不慎、乜不可大意哦！