〈嗯，夜香〉

嗯，夜香
河壩正要醒來
指尖个水珠
滴落，一身
清零

嗯，夜香
河壩半睡半醒

〈春天个目珠〉

青丟仔孵出一隻一隻
春天个目珠
跈等細河壩个心跳
春去秋來
河壩肚流漂个水樵 頂
螺貝仔个軟足
定定仔爬行

立春之河
喜悅 跳躍
舒暖个雲
明朗 流動
歡喜生出春天个心

春心
雀躍
河壩水
淰出來了

〈日出入〉

日出東片
一心向光 清明
窗台个五色梅
迎來淰黃个黃花
春夏秋冬本自俱足
日月星辰本自清淨

今本日穀雨 像酒
有人啉忒多
講係好雨知時節

立夏个半夜
月華緊向𠊎行等來
露水 酒水 目汁 風雨 星芒
串成月光菩薩个瓔珞 䯋鍊
陰晴圓缺
日出入

〈暗夜降臨〉

目麻个光脈
穿過田坵个縫罅
禾稈一葩過一葩企在田中央
日頭已斜

草蜢唧唧唧唧
跈等夜个敨氣
婦人家擎起針線
定定仔攣

在收成過後个禾稈項
露水凝結像一粒水鏡仔
星仔畏羞
看等月光
射出金銀色个弦光

鰱鯉鑽入厥个沙穴
風恬靜不語，歸屋下
只有燈盞火
像係等等
暗夜降臨

蝶仔在窗仔背噼哩啪拉
夜鷹還在屋簷廊項
𫟧上𫟧下
愐想未來个後生人
感應眾神靈在暗夜
降臨

〈春日清吟〉

春日，光尾點染
愛情个山脈
你多愁个目光
在日漸枯垂个圓身
皴點 荒涼个青春

跈等𫣆俚个心跳
幽寂
對過去到現下
都在𫣆俚失神个腳步亍行
一陣風來
娘花逐浪

牽等妹仔个手
涉水行過燥渴个河床
遠處
娘花个草稈項，飄落
𥍉亮个清吟

〈童年在時間之林跳躍〉

目珠閤等。一種規律又慢板个節奏
童年个心跳，跈等蒸氣火車个聲響，跳躍在時間之林
蹦飆个童年，夢想个堆疊像一節一節个車廂
流動个風景，流向下一個不知名个驛站
細人仔，滿足个穿越如蛇个未來
暗摸胥疏个窿空過後，強光
目珠擘毋開

目珠閤等。𠊎知自家還在个敨氣
愐起童年該隻分火車輾過个細孲仔
你个靈魂係毋係還孤栖徘徊在秋絮紛飛个鐵支路項
飛翔个意念像一把熊熊烈火
𠊎看著自家乜像
紙鷂仔逐飛影機
走撞墜落

擘開目珠。彎斡个鐵支路穿越在吾个體內
蒸氣火車嗚嗚个噴煙
童年个心跳，跈等蒸氣火車个煙屎，散落在時間之林
火車繼續穿越
流動个光景，緊來緊濛

〈青春〉

經血合等黃泥
做一隻大甕
裝載虛空个形影

往復个節奏
在荷爾蒙个密碼項
一蕊花 穿過
香絲之林

比星仔還較遠
比細雨毛仔還較感傷
月光
照等百合花个花蒂
同竊竊私語个兩隻乳菇

成時失忒生活个熱情
又疑狐 自家係毋係還在
想探測該最微小个想望

喔！雨點仔一墜落就青春了