1.
烏色波浪肚打出个星
看得著同看毋著个共時排列
浮過來个淨虛空定定
能量彳彳亍亍托核
也跈核隨緊漂流
八方一擺一擺碾出陣陣湧脈
疊出目下看著个泡影
天河斯像攣淰歸串寶石个揹帶
光光𥍉𥍉褶痕伸毋開
留分吾等擐心來款待

2.
山頭之間
綠光扭酒窟个樣相　拚命行
對遠遠飛過
掀起一波又一波
孤使得一𥍉目
風肚蛇形个徙動
成下紅成下青無斯吊菜色
對這山盤過該山
偎緊冰川平洋同凍泥
對時間个山窿煞煞揰落去

3.
無停過个晃晃激激
在空間裡肚掗核空間
緊發緊脹直直到爆撇
吾等迷迷迴緊轉緊轂像人玲琅樣
成時正手片成時左手片自家迷迷痴痴

想尋自由
自溜係風个堅持
這世界敢係真實个
對一蕊烏雲在山頂發酵
拋入拋出吂看真斯散撇咧

4.
遰穢歸路鬼噭聲
陰魂遊遊野野
在日頭落山乜在無日無夜个天涯
毋使煩愁這夜係毋係永久暗落去
蛇影在天頂來來去去
吞生吞死順續脫撇時間个殼
月圓中散做雪花
一蕊一蕊一大片嗒嗒跌啊嗒嗒跌
壅塵蒙密圍身層矺層
風霜捽金目珠又過了過

5.
日頭絲分大鑊定定弇落來
一下那啊斯斷烏咧
正開始頓恬無幾久
海浪斯企啊䟘來逐對平洋
扭酒風一籠一籠剷向大地
滿天鳥聲獸聲人聲
山川必析泥油㪐石滿哪竄
隆隆貢貢跌落烏影肚

6.
舂上跌落連係麼个
係麼个放勢拚命走
無人看得清楚
樹身稴稴斜搖無停
千隻萬隻鬼手樣在虛空肚緊扡緊拗
無幾多時樹頭斯在風肚無見著影

毋知係氣場也係磁場
無形無跡个盡得人驚

7.
對北方來个清冷凍氣把核大地
自從冰山橫撇打出海肚
海底無日無夜緊停動毋識恬靜
赤殼萬年來幾下到分這停動動醒
佢逐擺也無細義
大嘴一擘斯海水拋花作浪九萬丈
大大細細个魂魄吞落肚腸