阿公阿婆摎佢兜个子孫
𠊎出世該下阿公斯過身咧，對阿公个印象，完全來自阿姆摎滿叔屋下叔伯阿哥佢兜摎𠊎講个事情。
𠊎公安到彭阿相，新竹湖口人。天下無二彭，在臺灣姓彭个大體係客人，若講毋係盡可能係毋曉講客話定定，骨內還係客人底，這種毋曉講客个客人，斯係民族學所謂个「學老客」，這下乜正名安到「客底」。
彭姓係祝融八姓之一，文獻肚寫講係祝融、蚩尤个後代。祝融，名仔安到黎，係帝嚳个火官，掌管民事，後人敬重佢做火神，因為功勞當大，光輝做得照亮天下，帝嚳摎佢安名祝融。祝融後裔分做八姓：己、董、彭、禿、妘、曹、斟、芈這兜大姓，安到祝融八姓。歷史項一等有名个敢怕係彭祖，傳說佢食到八百零歲；乜有人講這個彭祖斯係《論語．述而》：「述而不作，信而好古，竊比於我老彭」寫个該個「老彭」。還記得有一擺𠊎在政治大學教書个歷史系去中國大陸做古都考察，其中一站係黃陵，系項同事全去行香祭拜，獨獨𠊎無去拜黃帝，因為黃帝係𠊎祖先蚩尤个仇敵，子孫仰般不孝乜做毋得去拜阿公婆个冤仇人哦！雖然在國族建構个時代（大約一八九○年到一九四五年），各種中國歷史教科書全寫黃帝係中華民族共同个祖先，毋過𠊎知黃帝在血統項摎𠊎實在無麼个相干，隨在該兜國族血緣論个人講到幾好聽、幾有理，黃帝就係摎𠊎無相干，若愛講有相干乜做得，該斯係𠊎祖先个死對頭。
新竹个客人當多，「彭」乜算係大姓，阿公當年在湖口做教書先生，斯係日本時代在漢學書院肚教漢文，差毋多就係童蒙教師个身分，教《三字經》、《百家姓》、《千字文》、《千家詩》這兜，所謂「三百千千」。滿叔屋下體大个叔伯阿哥講佢在眠床下，識看著阿公讀个書。
𠊎做細人仔个時節，滿叔屋下肚个叔伯阿哥長透講𠊎生著當像阿公，身胚高大、面四方，看起來斯像讀書人。逐擺叔伯阿哥恁樣講个時節，𠊎就摎佢兜變面，做麼个會恁樣形，𠊎乜講毋出來。一直到當多年以後，𠊎正想起來，𠊎係因為阿公無分阿爸去學校讀書這件事情試著當閼、火著。漢學先生个倈仔毋識字，係幾大个笑科？毋知會分人誚㸐幾多擺？阿爸个五個兄弟中，斯𠊎爸毋識字，這一點實在盡難得著𠊎个諒解。照阿姆摎𠊎講个，當年阿公因為食鴉片菸，摎家產做盡了淨淨，所以無分阿爸讀書。乜因為恁樣，𠊎對日本時代个四大家族得著鴉片專賣權，正經閼到齧牙𫠛齒。係講毋係恁樣，阿公乜毋會因為食鴉片菸造成屋下破產，嗄來無法度送阿爸入學。
講起家族个歷史，𠊎長下感覺阿公、阿婆摎佢兜个兒孫，實在係一部典型个臺灣家族史，甚至係一部臺灣歷史个縮影。阿公二討、阿婆二嫁；阿婆劉桂妹嫁分阿公个時節，就降有三個前人子，斯係大伯、二伯同大姑。
阿婆个前夫姓莊，降兩個倈仔，大伯莊金生、二伯張仁添。無定有人會試著奇怪，做麼个大伯摎二伯無共姓。該係因為阿婆个前夫家境窮苦，摎二伯送分人畜，所以跈養父姓張。阿婆嫁到彭屋以前，阿公摎頭一個餔娘無降子，斯揇個倈仔來承受香火，名仔安到彭鳳枝，在排行上算係𠊎个二伯。所以這其中个關係斯當微妙咧，有血緣（斯共個阿婆）个二伯姓張，無血緣个二伯顛倒姓彭。後來𠊎爸出世咧，照家族排行座第三大，大伯摎兩個二伯屋下个叔伯兄弟姊妹喊𠊎爸三叔，四叔摎滿叔屋下个叔伯兄弟姊妹喊𠊎爸三伯。四門六親對自家有兩個二伯抑係（二叔）个這件事情，大家像形乜無相干，乜毋係喊佢兜二伯，斯直接喊講仁添伯、鳳枝伯。
四叔彭訓添、滿叔彭富廷一個續等一個出世，在排行上斯無麼个問題，叔伯兄弟姊妹喊四叔阿添叔抑係（阿添伯）；滿叔因為係吊尾錘，自然斯係喊佢滿叔。