▎大水浮城

想欲寫一張批予你　佇大水來到跤兜的時
頭起先　日頭毋知予啥人延延　無照起工行
雨水無站無節　所在愈占愈闊
門埕、戶橂、椅桌、樓梯、眠床　一寸一目𥍉
等我想著寫批　世界已經是𪜶的矣

若是你佇遮　我敢會和你佇大水內底相攬
抑是我會選擇一个——手伸出去就搝會著的人
攬伊敢會相仝
我無定著會和伊沉落去　做水底的考古學家
一格閣一格探坑　咱的舊生活

彼時　咱猶咧諍　律師佮作穡人啥人秤起來較重
煞無注意語言對雙爿門窗
沿路摔入去酒矸仔內　做標本的惡夢
寫過的字紙綴大水浮沉
白賊佮希望攏予水揬破
這時　你會佮我講啥
欲早知　抑是勇敢留佇遮

若是你佇　世界拄欲歪斜的彼搭
你會開始搬徙　抑是鬥扞
敢會創造出另外一个平行宇宙
咱佇遐　日花仔無的確浮佇你的面容仔
我毋免寫批
大水袂閣浮城？

遠兜厝尾頂有人擛手　分食物仔
害我想著感情佮理想崇拜的期限
有時　是一塊俗麭歹去彼工

落尾我欲寫
運命若是註定　拍拚的道理是啥
既然肉身終點攏相𫝛
若毋驚　一切就無啥物可怕
大水做對頭
嘛會使好好仔欣賞　拍拚過的風景浮起來的夢

順紲　食一塊麭



＊寫給理念或價值觀不同的家人情人朋友，在〈我愛黑眼珠〉的場景裡，我們終會找到一切行動的理由。

▎紙的災厄：獻予我的查某朋友
歹勢　我閃無過
衝面挵過來的運命
成做一張紙
我毋知影欲按怎共家己　變甲較輕較薄

每一工　精神了後就拍拚練習
欲按怎才閃會過
一針一句的剾洗
愛啥物款的姿勢
才覕會過
眼神內底的刀鋩

颺風的時　愛細膩
傷奢颺的風會掛石頭
共我掔破
注意　一張紙袂使凊彩踏差

每一暗　攏想欲共家己展予平
有時陣嘛想欲跳舞
毋過斟酌捲予好
才有好勢的一暝

佇看袂著的烏暗底
總是有siâng
講伊擋袂牢想欲
揬破　一張紙的清白

恁攏希望紙會使閣較輕　閣較薄
如此
就會使走閃損蕩的運命
這命　毋知是啥人的

畢竟
成做一張紙
就是阮　上大的災厄