風  吹
Hong-tshue

風吹風吹， 
Hong-tshue hong-tshue,
佇天頂飛，
tī thinn-tíng pue,
風吹風吹，
hong-tshue hong-tshue,
飛啊飛， 
pue--ah pue,
伊有時佇天頂 
i ū-sî tī thinn-tíng
佮白雲覕相揣！ 
kah pe̍h-hûn bih-sio-tshuē!


鳥鼠佮膨鼠
Niáu-tshí kah phòng-tshí

鳥鼠是鳥鼠，
Niáu-tshí sī niáu-tshí,
膨鼠是膨鼠，
phòng-tshí sī phòng-tshí,
仝款喙尖尖，
kāng-khuán tshuì tsiam-tsiam,
仝款尖喙齒；
kāng-khuán tsiam tshuì-khí;
鳥鼠愛食米，
niáu-tshí ài tsia̍h bí,
膨鼠愛食果子；
phòng-tshí ài tsia̍h kué-tsí;
看著鳥鼠，逐家真受氣，
khuànn-tio̍h niáu-tshí, ta̍k-ke tsin siū-khì,
看著膨鼠，逐家真歡喜！
khuànn-tio̍h phòng-tshí, ta̍k-ke tsin huann-hí!


鴨咪仔
Ah-bî-á

鴨咪仔，真古錐，
Ah-bî-á, tsin kóo-tsui,
行路跤開開，
kiânn-lōo kha khui-khui,
尻川扭一下、扭一下，
kha-tshng ngiú--tsi̍t-ē, ngiú--tsi̍t-ē,
行去草仔堆，
kiânn-khì tsháu-á-tui,
看著一尾杜蚓仔，
khuànn-tio̍h tsi̍t bué tōo-ún-á,
大喙就開開開！
tuā tshuì tiō khui-khui-khui!


阿草飼粉鳥
A-tsháu tshī hún-tsiáu

阿草阿草，飼粉鳥， 
A-tsháu A-tsháu, tshī hún-tsiáu,
粉鳥袂飛換飼雞， 
hún-tsiáu bē pue uānn tshī ke,
雞袂啼，換去種番薯， 
ke bē thî, uānn khì tsìng han-tsî,
番薯袂鬆，換學磅米芳， 
han-tsî bē sang, uānn o̍h pōng-bí-phang,
米芳𠕇硞硞，
bí-phang tīng-khok-khok,
磅一下規鼎烏漉漉！ 
pōng tsi̍t-ē kui tiánn oo-lok-lok !