「這馬換劉芳玲上台報告。」
“Tsit-má uānn Lâu Hong-lîng tsiūnn-tâi pò-kò.”

哎唷！
欲上台的時，阿玲跋一倒。
Aih--ioh!
Beh tsiūnn-tâi ê sî, A-lîng pua̍h tsi̍t tó.

伊緊張甲心肝頭咇噗跳，
規个面紅記記，若像咧發燒……
I kín-tiunn kah sim-kuann-thâu phi̍h-pho̍k-thiàu,
kui ê bīn âng-kì-kì, ná-tshiūnn teh huat-sio……

伊感覺強欲袂喘氣，
規个頭殼愣去……
I kám-kak kiōng-beh buē tshuán-khuì,
kui-ê thâu-khak gāng--khì……

這幾工準備足久欲講的話，
全部攏窒佇嚨喉空。
Tsit kuí kang tsún-pī tsiok kú beh kóng ê uē,
tsuân-pōo lóng that tī nâ-âu-khang.

新買的自動鉛筆雄雄煞輾落去塗跤，
擗！筆芯摔斷去矣。
Sin bué--ê tsū-tōng iân-pit hiông-hiông suah liàn--lo̍h-khì thôo-kha ,
Phia̍k! Pit-sim siak-tn̄g--khì--ah.

最後，阿玲黐黐突突將伊的報告講煞。
Tsuè-āu, A-lîng ti-ti-tu̍t-tu̍t tsiong i ê pò-kò kóng suah.

落台的時，伊行毋著位，閣去踢著桌仔跤。
Lo̍h-tâi ê sî, i kiânn m̄-tio̍h uī, koh khì that-tio̍h toh-á-kha.

全班笑甲反過閣歪腰去，
阿玲就按呢行轉去伊家己的位。
伊感覺今仔日真正是上蓋害的一工。
Tsuân-pan tshiò kah píng--kè koh uai-io khì,
A-lîng tiō-án-ne kiânn tńg-khì i ka-kī ê uī.
I kám-kak kin-á-li̍t tsin-tsiànn sī siōng kài hāi ê tsi̍t kang.

暗時欲睏進前，伊猶是真艱苦。
Àm-sî beh khùn tsìn-tsîng, i iá-sī tsin kan-khóo.
逐家攏講這毋是啥物天大地大的代誌，
「猶毋過對我來講，伊就是啊！」
阿玲心肝內是按呢想的。
Ta̍k-ke lóng kóng tse m̄-sī siánn-mih thinn-tuā-tē-tuā ê tāi-tsì,
“Iá-m̄-koh tuì guá lâi kóng, i tiō sī--ah!”
A-lîng sim-kuann-lāi sī án-ne siūnn--ê.