美男子竇蓮魁－標準化台語漢字版
頭齣
〔演出閣有五分鐘就欲開始，樂師佇咧調音，場務人員請觀眾入場。演竇蓮魁的演員坐踮演員休息室內底，咧欲梳妝好矣。演員拍開慣勢使用的手機仔社群軟體，進行視訊直播。精心化妝過的面容，投影踮舞台兩爿的螢幕。親像平常時演出進前的儀式仝款，戲迷留的訊息佮愛心符號直直來，演員佮觀眾互動、對答。開場時間到矣，演員行向舞台，直播禁掉。〕
〔觀眾席電火漸漸暗來。場務人員舉牌提醒觀眾愛共手機仔關起來，音樂起，字幕捲動。〕
第一場
［大幕開。1935年，太陽寫真場。〕
［太陽寫真場是一間時行的店。壁佮櫥窗頂懸掛真濟「啟蒙顧客美感」的人像相片，每一个人物看起來攏活跳跳。店鋪內以暗房、攝影棚、小客廳區分空間。攝影棚內，烏柴屏頭前，妙峰坐佇單人椅頂懸，頭戴大頂的查某帽仔，半遮面。手提羽毛合扇，腰縖紗裙，裙跤現出尖頭懸踏皮靴。伊拄好咧翕當時流行的「男扮女裝」的寫真，因為妝了誠好，看起來佮女性無無仝。香檀坐踮小客廳的絨布長椅條，興味真足來看向攝影棚彼爿。雲清替妙峰調整姿勢的角度、翕相。〕
雲清：你的面倚正手爿一點仔，下頦攑起來。好，先莫振動。
［幾秒鐘後，翕相完成。〕
雲清：好矣。
妙峰：雲清！你這馬共香檀小姐單獨翕一張仔好無？
［妙峰對椅仔頂徛落來，共帽仔佮紗裙褪掉，是一位相貌堂堂的烏狗兄。〕
［香檀抹大紅色胭脂，坐咧原先妙峰坐的椅仔頂，換妙峰共看。妙峰憐愛將伊的頭鬃掰去耳後。妙峰坐咧香檀原先坐的絨布長椅條。〕
［雲清瞭一下仔相機觀景窗，指喙角，意思是香檀的胭脂抹著喙角。香檀拄欲用家己的手巾仔拭，雲清共伊擋咧。〕
雲清：你莫振動！
［雲清用家己的手巾仔詳細拭香檀的喙角，就共手巾仔烏白擲佇塗跤，然後換新的底片。〕
雲清：等一下……好，香檀小姐，吸一口氣，莫振動。
［高騰入場。〕
妙峰：高騰！
高騰：妙峰。
妙峰：你來矣？你也來翕相？
高騰：雲清衣錦榮歸，佇太平町開業，我自然愛來捧場。
妙峰：高騰，你嘛來換衫一下。你扮先生，我就扮先生娘！
［雲清替香檀翕寫真翕好，提出底片。〕
高騰：〔對妙峰〕哈哈哈，真可惜我已經有某有囝矣。
雲清：高騰伊家己就是先生！你是欲伊扮啥物仙？妙峰：雲清，你口氣誠䆀喔，你奇怪喔，今仔日我入來以後，你就親像三魂七魄散散去。
雲清：好矣，過幾工你才閣來提寫真。
［香檀對椅仔頂徛落來。〕
香檀：白先生，感謝你今仔日為我翕相。
雲清：你太多禮矣，香檀小姐。
［香檀共手巾仔抾起來。〕
香檀：這條手巾仔，我提轉去洗清氣才奉還。
雲清：無要緊，只是一條手巾仔爾爾。
妙峰：你若是共香檀小姐的「寫真」（siah3sin51，しゃしん）掛出來當做「看板」（khang35 pang51，かんばん），一定為你招真濟生理。你的技術，比其他佇大稻埕開業的內地人閣較好，愛好好仔宣傳。
雲清：妙峰，好兄弟，多謝你。
妙峰：講啥物多謝，十幾年的換帖矣。我兩點進前欲轉銀行，阮愛先來走矣。香檀，咱來行！
香檀：再會，「白さん」（Hah5 khuh3 sang11）、「高先生」（Khoo51sen25 se51）。
〔香檀佮妙峰同齊落。高騰看香檀迷人的背影離開。〕
高騰：香檀……這个香檀小姐敢是藝旦間的新人？足面熟。
雲清：你敢會記得以前佇竇昆山■兜做下跤手人的招弟？香檀就是伊的查某囝罔市。
高騰：我毋知。竇昆山彼个老番顛敢毋是死規若個月矣？自伊十幾年前死獨生女，伊就閉門不出，厝內倩的也攏辭了了，神神祕祕。
［雲清若像無咧聽高騰講話仝款，收拾物件，敢若咧等待啥物貴客。〕
高騰：竇昆山死矣，伊彼幾間紡織廠，總愛有人來繼承著毋？林家敢毋是竇家的表親？妙峰敢有共你講啥？
雲清：我實在是太意外囉。我掠準你是上流社會的花蝴蝶，你哪會毋知？
高騰：我真正毋知啊！
雲清：竇昆山的外孫一個外月前就轉來矣。伊是竇家唯一的繼承人，這馬攏對外講伊是竇昆山生的屘仔囝。
高騰：敢是妙峰共你講的？伊哪會無共我講？
雲清：因為你厚話。
高騰：我干焦知影竇昆山的獨生女當年是大稻埕第一美人，煞綴厝內倩的走，想袂到閣有留這个骨肉。竇昆山共藏了真好。
雲清：妙峰無共我講，不過彼个囡仔頭一擺來遮的時陣，我就看出來矣。
高騰：伊已經來過你遮矣？原來你遮才是上流社會的後花園。你敢共翕寫真矣？若按呢，洗出來敢會使予我鼻芳一下？
雲清：我無想欲予任何人看。
高騰：為啥物？
雲清：我想……既然是伊的寫真，伊應該愛頭一个看。
高騰：喔？為啥物？雲清：唉……無為啥物。
高騰：這竇昆山的「囝」，叫啥物名？
雲清：伊，伊的名叫做……竇蓮魁。
［雲清望向烏柴屏的方向，時間轉去到竇蓮魁第一改到太陽寫真場的時。〕
［竇蓮魁對烏柴屏後行出來。因為傷媠，以至雲清一時看了愣去。〕
蓮魁：（唱）竇蔻含辛露甜連梢，
Tōo-khòo hâm sin lōo-tinn-liân-sau,
蓮實有苦藏在紅嬌，
Liân-si̍t iú khóo tsōng-tsāi âng-kiau,
魁星降世際遇金貂，
Khue-sing kàng-sè tsè-gū kim-tiau,
美夢成真富貴來招。
Bí-bāng sîng-tsin hù-kuì lâi tsiau.
男兒擎雲臨風玉柱，
Lâm-lî khîng hûn lîm-hong-gio̍k-thiāu,
子都橫槊山有松喬，
Tsú-too hîng-so̍k san iú siông-kiâu,
在外流浪落葉水漂，
tsāi guā liû-lōng lo̍h-hio̍h tsuí-phiau,
此時歸根轉來阮兜。
tshú-sî kui-kin tńg- lâi gún tau.
頭齣
〔演出閣有五分鐘就欲開始，樂師佇咧調音，場務人員請觀眾入場。演竇蓮魁的演員坐踮演員休息室內底，咧欲梳妝好矣。演員拍開慣勢使用的手機仔社群軟體，進行視訊直播。精心化妝過的面容，投影踮舞台兩爿的螢幕。親像平常時演出進前的儀式仝款，戲迷留的訊息佮愛心符號直直來，演員佮觀眾互動、對答。開場時間到矣，演員行向舞台，直播禁掉。〕
〔觀眾席電火漸漸暗來。場務人員舉牌提醒觀眾愛共手機仔關起來，音樂起，字幕捲動。〕
第一場
［大幕開。1935年，太陽寫真場。〕
［太陽寫真場是一間時行的店。壁佮櫥窗頂懸掛真濟「啟蒙顧客美感」的人像相片，每一个人物看起來攏活跳跳。店鋪內以暗房、攝影棚、小客廳區分空間。攝影棚內，烏柴屏頭前，妙峰坐佇單人椅頂懸，頭戴大頂的查某帽仔，半遮面。手提羽毛合扇，腰縖紗裙，裙跤現出尖頭懸踏皮靴。伊拄好咧翕當時流行的「男扮女裝」的寫真，因為妝了誠好，看起來佮女性無無仝。香檀坐踮小客廳的絨布長椅條，興味真足來看向攝影棚彼爿。雲清替妙峰調整姿勢的角度、翕相。〕
雲清：你的面倚正手爿一點仔，下頦攑起來。好，先莫振動。
［幾秒鐘後，翕相完成。〕
雲清：好矣。
妙峰：雲清！你這馬共香檀小姐單獨翕一張仔好無？
［妙峰對椅仔頂徛落來，共帽仔佮紗裙褪掉，是一位相貌堂堂的烏狗兄。〕
［香檀抹大紅色胭脂，坐咧原先妙峰坐的椅仔頂，換妙峰共看。妙峰憐愛將伊的頭鬃掰去耳後。妙峰坐咧香檀原先坐的絨布長椅條。〕
［雲清瞭一下仔相機觀景窗，指喙角，意思是香檀的胭脂抹著喙角。香檀拄欲用家己的手巾仔拭，雲清共伊擋咧。〕
雲清：你莫振動！
［雲清用家己的手巾仔詳細拭香檀的喙角，就共手巾仔烏白擲佇塗跤，然後換新的底片。〕
雲清：等一下……好，香檀小姐，吸一口氣，莫振動。
［高騰入場。〕
妙峰：高騰！
高騰：妙峰。
妙峰：你來矣？你也來翕相？
高騰：雲清衣錦榮歸，佇太平町開業，我自然愛來捧場。
妙峰：高騰，你嘛來換衫一下。你扮先生，我就扮先生娘！
［雲清替香檀翕寫真翕好，提出底片。〕
高騰：〔對妙峰〕哈哈哈，真可惜我已經有某有囝矣。
雲清：高騰伊家己就是先生！你是欲伊扮啥物仙？妙峰：雲清，你口氣誠䆀喔，你奇怪喔，今仔日我入來以後，你就親像三魂七魄散散去。
雲清：好矣，過幾工你才閣來提寫真。
［香檀對椅仔頂徛落來。〕
香檀：白先生，感謝你今仔日為我翕相。
雲清：你太多禮矣，香檀小姐。
［香檀共手巾仔抾起來。〕
香檀：這條手巾仔，我提轉去洗清氣才奉還。
雲清：無要緊，只是一條手巾仔爾爾。
妙峰：你若是共香檀小姐的「寫真」（siah3sin51，しゃしん）掛出來當做「看板」（khang35 pang51，かんばん），一定為你招真濟生理。你的技術，比其他佇大稻埕開業的內地人閣較好，愛好好仔宣傳。
雲清：妙峰，好兄弟，多謝你。
妙峰：講啥物多謝，十幾年的換帖矣。我兩點進前欲轉銀行，阮愛先來走矣。香檀，咱來行！
香檀：再會，「白さん」（Hah5 khuh3 sang11）、「高先生」（Khoo51sen25 se51）。
〔香檀佮妙峰同齊落。高騰看香檀迷人的背影離開。〕
高騰：香檀……這个香檀小姐敢是藝旦間的新人？足面熟。
雲清：你敢會記得以前佇竇昆山■兜做下跤手人的招弟？香檀就是伊的查某囝罔市。
高騰：我毋知。竇昆山彼个老番顛敢毋是死規若個月矣？自伊十幾年前死獨生女，伊就閉門不出，厝內倩的也攏辭了了，神神祕祕。
［雲清若像無咧聽高騰講話仝款，收拾物件，敢若咧等待啥物貴客。〕
高騰：竇昆山死矣，伊彼幾間紡織廠，總愛有人來繼承著毋？林家敢毋是竇家的表親？妙峰敢有共你講啥？
雲清：我實在是太意外囉。我掠準你是上流社會的花蝴蝶，你哪會毋知？
高騰：我真正毋知啊！
雲清：竇昆山的外孫一個外月前就轉來矣。伊是竇家唯一的繼承人，這馬攏對外講伊是竇昆山生的屘仔囝。
高騰：敢是妙峰共你講的？伊哪會無共我講？
雲清：因為你厚話。
高騰：我干焦知影竇昆山的獨生女當年是大稻埕第一美人，煞綴厝內倩的走，想袂到閣有留這个骨肉。竇昆山共藏了真好。
雲清：妙峰無共我講，不過彼个囡仔頭一擺來遮的時陣，我就看出來矣。
高騰：伊已經來過你遮矣？原來你遮才是上流社會的後花園。你敢共翕寫真矣？若按呢，洗出來敢會使予我鼻芳一下？
雲清：我無想欲予任何人看。
高騰：為啥物？
雲清：我想……既然是伊的寫真，伊應該愛頭一个看。
高騰：喔？為啥物？雲清：唉……無為啥物。
高騰：這竇昆山的「囝」，叫啥物名？
雲清：伊，伊的名叫做……竇蓮魁。
［雲清望向烏柴屏的方向，時間轉去到竇蓮魁第一改到太陽寫真場的時。〕
［竇蓮魁對烏柴屏後行出來。因為傷媠，以至雲清一時看了愣去。〕
蓮魁：（唱）竇蔻含辛露甜連梢，
Tōo-khòo hâm sin lōo-tinn-liân-sau,
蓮實有苦藏在紅嬌，
Liân-si̍t iú khóo tsōng-tsāi âng-kiau,
魁星降世際遇金貂，
Khue-sing kàng-sè tsè-gū kim-tiau,
美夢成真富貴來招。
Bí-bāng sîng-tsin hù-kuì lâi tsiau.
男兒擎雲臨風玉柱，
Lâm-lî khîng hûn lîm-hong-gio̍k-thiāu,
子都橫槊山有松喬，
Tsú-too hîng-so̍k san iú siông-kiâu,
在外流浪落葉水漂，
tsāi guā liû-lōng lo̍h-hio̍h tsuí-phiau,
此時歸根轉來阮兜。
tshú-sî kui-kin tńg- lâi gún tau.
