《牛埔頭的彼陣海牛》

佇牛埔頭紅天赤日的
中晝 風走去外海捒風車
雲尪仔踮天頂佮日頭覕相揣
海底浮浪貢的流浪秀才
予藝術家牽轉來門口埕
變做一隻一隻
看天食飯的
海牛

想起細漢 老爸飼的彼隻水牛
透早拖甘蔗 去蔗埕交火車
逐工拖袂了 散赤苦痛的命運
田園反鹹 犁袂出止枵的糧草
綴牛落田 受盡拖磨的爸母
做牛拖 做人磨
做雞筅 做人反

王功 有機冊店的藝術家
利用歹銅舊錫的廢棄物
編織伊對性命體驗出來的
價值 解說臺灣人刻苦耐勞的
水牛精神
嘛對港口的風 做出溫柔的報答
黃昏的時 白翎鷥飛入岫
糞埽的醫療團共蚵架仔 蚵殼仔
用索仔縛成海岸邊的木麻黃
守護彼片海坪的湳仔地

痚呴喘的海風
偷偷仔來講 咱兜頂擺
拒絕國光煙筒的湳仔地
這馬 財團數想欲來種電火
大輪的風車 插入湳仔地
鳥仔毋敢閣飛來揣食
電波射入砂馬仔 花鮡
蚵仔 蚶仔攏嘛會死去
鹹水潑面的鄉親
牛埔頭的這陣海牛
毋知 按怎活落去？

──發表佇《自由時報》二○二四年三月廿八日

【註解】
1.覕相揣（bih-sio-tshuē/bih-sio-tshē）：捉迷藏。
2.浮浪貢（phû-lōng-kòng）：浪子。游手好閒、不務正業、玩世不恭的人。
3.散赤（sàn-tshiah）：貧窮、窮困。缺乏錢財，生活拮据困乏。
4.止枵（tsí-iau）：充飢。吃東西解餓。